भांगरभूंय | प्रतिनिधी
दोन दुचाकींचो अपघात
दोग जाण गंभीर जखमी
एकल्याची भलायकी हुस्क्याची
भांगरभूंय । प्रतिनिधी
फोंडें : बेतोडें बायपास रस्त्याचेर दोन दुचाकीं मदीं जाल्ल्या भिरांकूल अपघातांत एके विद्यार्थिनी सयत दोगांक मरण आयलें. हेर दोग जाण गंभीर जखमी जाल्यात. तातूंतल्या एका तरणाट्याची भलायकी हुस्क्याची आसा, अशी म्हायती मेळ्ळ्या.
बिरेस्तारा दनपारां अडेज वरांच्या सुमाराक दोनूय दुचाकीं आमकारा – सामकारा एकामेकांक नेटान आपटल्यो. एके दुचाकीचे फाटल्यान बशिल्ली विद्यार्थीनी ईशा गांवस (केरी – सत्तरी) हिका सुवातेचेरूच मरण आयलें. दुसरे दुचाकी वयलो आदित्य देसाय (बेतोडें) हाकाय सुवातेचेरूच मरण आयलें.
आदित्य देसाय एके वटेन वताले. त्या वेळार मुखा वयल्यान अदिती उमेश मांद्रेंकार (तुळशीमळा, पर्ये- सत्तरी) आनी ईशा गांवस (केरी- सत्तरी) येताल्यो. धोफरायत येवपी आदित्य देसाय हाचे स्कुटरीक अदितीचे स्कुटरीचो धपको बसलो. अपघातांत ईशा गांवस हिका सुवातेचेरूच मरण आयलें. मुखा वयल्यान येवपी आदित्य देसाय हाकाय सुवातेचेरूच मरण आयलें. आदित्याच्या फाटल्यान बशिल्लो योगेश पाटील (महाल, कुर्टी) हो गंभीर जखमी जाला. चारूय जखमींक फोंडेंच्या उपजिल्हो हॉस्पिटलांत दाखल केले. हॉस्पिटलांत दोगांक मरण आयिल्ल्याचें घोशीत केले. उरिल्ल्या दोगांक अदीक उपचारा खातीर जीएमसींत दाखल केल्यात. तातूंतल्या योगेश पाटील हाची भलायकी हुस्क्याची आसा, अशें कळ्ळां.
शिरोडेंच्या कामाक्षी होमिओपॅथीच्यो त्यो दोगूय विद्यार्थिनी आशिल्ल्यो. कालूच तांचो निरोप सुवाळो जाल्लो. मात कांय कामा निमतान शुक्रारा त्यो कॉलेजीक आयिल्ल्यो. कॉलेजींतल्यान वतना हो अपघात जालो.
बापायची इत्सा पुराय जाली, पूण…
गोपाळ गांवस हांकां आपले धुवेक ईशाक दोतोर करपाचें आशिल्लें. भुंयपालच्या बस बांदणी प्रकल्पांत तो सुपरवायझर म्हूण काम करता. ताणें ईशाक सगळे तरेचो तेंको दिल्लो. तिचे परिक्षेचो निकाल लागताच आपली इत्सा पुराय जाल्ल्याची भावना तांणी उक्तायल्ली. तो उमेदीन भरिल्लो खरो, पूण ताची ती उमेद फक्त कांय दिसांची थारली. मेळिल्ले म्हायती प्रमाण ईशा गांवस हिचे कुडीचेर शुक्रारा निमाणे संस्कार करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
