भांगरभूंय | प्रतिनिधी
भांगरभूंय । प्रतिनिधी
फोंडेंः बेतोडें पंचायत वाठारांतल्या आशेवाडो हांगा वयल्या वाठारांत रावपी लोकांक नळाचें उदक पावना म्हणून तांका टॅन्करान उदकाची पुरवण करतात. टॅन्कराचें हें उदक प्लास्टिकाच्या बॅरलांनी साठोवन दवोरतात. कांय दिसां आदीं भलायकी खात्याच्या कर्मचाऱ्यांनी वचून ह्या उदकाची तपासणी करून लोकां मदीं जाग्रुताय केली.
आशेवाडा हांगा वयल्या वाठारांत नळाचें उदक पावना म्हणून फाटल्या कांय वर्सां सावन थंयच्या लोकांक टॅन्कारानी व्हरून उदक दितात. एक दीस सोडून हें उदक दितात. हांका चड करून स्थलांतरीत कामगार लोक रावतात. ते प्लास्टिकच्या बॅरलांनी उदक भरून दवोरतात. पोरूं दत्तगड हांगा बॅरलांनी उदक साठोवन दवोरल्ल्यान थंय डेंग्यूचे दुयेंती मेळिल्ले. भलायकी खात्यान तपासणी केली तेन्ना बॅरलांनी उदक साठोवन दवोरिल्ल्यान डेंग्यू जळेरां तयार जाल्ल्याचें दिसून आयिल्लें.
भलायकी अधिकारी डॉ स्मिता पार्सेकार हिच्या मार्गदर्शना खाला नितळसाण निरीक्षक मनोज नायक हाणे आशेवाडो हांगा वचून उदकाची तपासणी केली आनी थळाव्या लोकां मदीं डेंग्यू विशीं जाग्रुताय केली. उदक चड दीस साठोवन दवोरचें न्हय अशें ताणे लोकांक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
