बेतोडेंच्या घातक जंक्शनार बसयतले सिग्नल

बेतोडेंचें थारत आशिल्लें घातक जंक्शन.

भांगरभूंय | प्रतिनिधी

बेतोडें पंचायतीचो फुडाकार; फेब्रुवारी सोंपता म्हणसर काम जातलें पुराय

फोंडें: बेतोडें बायपास रस्त्या वेलें घातक जंक्शन सेगीत जावपी अपघाताक लागून खूबशें चर्चेंत उरलां. ‘ब्लॅक स्पॉट’ थारत आशिल्ल्या जंक्शना कुशीक सिग्नल बसोवपाची मागणी बेतोडें पंचायतीचे ग्रामसभेंत खूबशे फावटी केल्ली. लोकांचे मागणेची दखल घेवन रोखडेंच घातक जंक्शनार सिग्नल बसोवपाच्या कामाक सुरवात जातली. फेब्रुवारी म्हयनो सोंपता म्हणसर घातक जंक्शनार सिग्नल बसयले उपरांत अपघाताचेर नियंत्रण येतलें. ताका लागून फोंडें म्हालांतल्या रस्त्यार सिग्नल बसोवपाचो पयलो मान बेतोडें पंचायतीक मेळटलो.

घातक जंक्शनार सिग्नल बसोवपाचे सगले कायदेशीर सोपस्कार पुराय जाल्यात फेब्रुवारी म्हयन्या सावन वाठारांत सिग्नल बसोवपाच्या कामाक सुरवात जातली. हे खातीर बेतोडें पंचायत मंडळान फुडाकार घेवन अपघात आडावपा खातीर म्हत्वाचो निर्णय घेतला. घातक जंक्शनार आयज मेरेन कितलेशेच अपघात जाल्यात.

कांय वर्सां पयलीं एका येरादारी पुलीस उपनिरिक्षकाक अपघाती मरण लेगीत त्याच जंक्शनार आयिल्लें. ह्या जंक्शना वेल्यान अवजड येरादारी वाडल्या आनी थंय उड्डाणपूल उबारपाची मागणी लोकां कडल्यान जाताली. बेतोड्यां उद्देगीक वसणूक आशिल्ल्यान व्हड प्रमाणांत अवजड वाहनां ह्याच जंक्शना वेल्यान यो-वच करीत आशिल्ल्यान बेतोडें ते फोंडें मार्गा वेल्या वाहन चालकांक तें जंक्शन घातक थारत आसा. जंक्शना कुशीची येगरादारी सुरळीत करपा खातीर थळाव्या लोकांनी हाचे पयलीं सिग्नल बसोवपाची लेगीत मागणी केल्ली.

बोणबाग-बेतोडें बायपास रस्त्याचें रुंदीकरण केलां. रुंदीकरण केल्ल्या रस्त्याच्या मदेकांत दुभाजक घाल्ल्यान बोणबाग गांवांतल्या लोकांक यो-वच करप कठीण जालां. थळाव्या लोकांक यो-वच करपा खातीर रस्त्याच्या मदेकांत घाल्ले दुभाजक चार कडेन काडपाची मागणी थळावे लोक करीत आशिल्ले. हे संबंदी बेतोडें पंचायतीचे सरपंच मधू खांडेपारकार हांणी वाठारांत सिग्नल बसोवपाची विनंती राष्ट्रीय म्हामार्ग खात्या कडेन केल्या. बेतोडें जंक्शना बरोबर बायथाखोल, ढवळी, फर्मागुडी आनी कुट्टी हांगासरलीं जंक्शनां घातक जाल्यांत. बेतोडें पंचायतीन घेतिल्लो फुडाकार हेर पंचायती खातीर उर्बा दिवपी थारतलो. ताका लागून फुडारांत हेर जंक्शनाचेर सिग्नल बसोवपाची शक्यताय उक्तायतात.