भांगरभूंय | प्रतिनिधी
बंदर प्रकल्पाक लागून पर्यावरणाचें लुकसाण: एल्टन डिकॉस्टा
मडगांव: बेतूलच्या प्रस्तावीत बंदर प्रकल्पाक लागून पर्यावरणाचें लुकसाण जातलें. हाका लागून थळाव्यांच्या पोट चलोवपाच्या साधनाचो प्रस्न निर्माण जातलो. म्हणून ह्या प्रकल्पाक थळावे नागरीक आनी पंचायतीचो खर विरोध आसा. ह्या प्रकलपा विशीं सरकारान आपल्या विस्वासांत घेवंक नाशिल्ल्यान हो प्रकल्प खंयचेच परिस्थितींत जावपाक दिवचो ना, अशी शिटकावणी केपेंचे आमदार एल्टन डिकॉस्टा हांणी दिली. ह्या वेळार पत्रकार परिशदेक आमदार एल्टन डिकॉस्टा हांचे सयत नाकेरी बेतूलचे सरपंच प्रीतम देउळकार, उपसरपंच दामास्को डिसिल्वा, पंच जॉली सिमोईस आनी साल्वासो फर्नांडिस हाजीर आशिल्ले.
आमदारांचो आक्षेप
आमदार डिकॉस्टा हांणी, सागरमाला येवजणे खाला जावपी ह्या बंदराक ह्यान पयलींच्या आमदारांनी विरोध केल्लो जाल्यार हो प्रकल्प परत येवचो नाशिल्लो. ह्या प्रकल्पा विशीं पंचायतीक वा आमदार म्हणून आपल्याक कसलीच म्हायती दिवंक ना. प्रशासनाकडलयनूय कसलीच म्हायती उपलब्ध नाशिल्ल्याचें तांणी सांगलें.
प्रकल्प राबयतना लोकांक विस्वासांत घेवप गरजेचें. लोकांक ना ते प्रकल्प तांचेर लादचे न्हय. ह्या प्रकल्पाचो फटको केपें सयत वेळ्ळी, बाणावलेच्या नुस्तेंमार्यांकूय बसतलो. पंच वांगड्यां सयत बेगीनूच मुख्यमंत्र्यांची भेट घेवन लोकांच्यो भावना तांचे मुखार मांडटले. नुस्तेंमार्यांचो वेवसाय, पर्यटन आनी पर्यावरणाचें लुकसाण करपी हो बंदर प्रकल्प कितेंय जालें तरी जावपाक दिवचो ना. सरकारान बेतूलच्या छत्रपती शिवरायांच्या किल्ल्याक पुनर्वैभव मेळोवन दिवचें आनी लोकांक ना अशे प्रकल्प हाडचे न्हय, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
