भांगरभूंय | प्रतिनिधी
मडगाव : वेर्णेंचे एके कंपनीच्या बेतूल-नाकेरीच्या स्फोटकांच्या गुदांवाक काल बिरेस्तारा रातीं उजो लागून स्फोट जालो. आमदार एल्टन डिकॉस्टा हांचे सयत थळाव्यांनी सुरक्षिततायेचे नदरेन कंपनीच्या अधिकार्यां कडेन चर्चा केली. ह्या वेळार तांचे मदीं वादूय जालो. उज्याचेर नियंत्रण हाडलां तरी थळाव्यां मदीं हे घडणुकेची तिडक आशिल्ल्याचें दिसता.
शस्त्रां निर्माण करपी कंपनींचो हो गुदांव. हातूंत स्फोटकांचो सांठो आसा. स्फोटकांनी पेट घेतिल्ल्यान व्हड आवाज जालो. कुंकळ्ळी मेरेन ह्या उज्याचे लोट मळबांत वतनाना दिसताले.
मजगतीं, आमदार डिकॉस्टा रोखडेच घडणुके सुवातेर पावले. थळाव्यांनी सुरक्षितताये विशीं आमदारांकूय विचारलें. ह्या वेळार आमदार एल्टन आनी थळाव्यांनी कंपनीच्या अधिकार्यां कडेन, उजो लागचो न्हय म्हणून कसले उपाय केल्ले हें विचारलें. तेन्ना अधिकार्यांनी स्फोट जावंक ना, फकत उजो लागला अशें सांगलें. आमदार एल्टन हांणी सांगलें, आदले व्हिडियो पळयात आनी उपरांतूच स्फोट जाला काय उजो लागला तें थारायात. नागरिकांक कारणां दिनासतना कंपनीच्या अधिकार्यांनी लोकांचें आयकुपाक जाय.
एके म्हायती प्रमाण, ह्या गुदांवांतलो दारुगुळ्याचो सांठो लासल्यांत. उजो पालोवपी दळान रातीं देड वरांचेर उज्याचेर नियंत्रण हाडलें. उपरांत दक्षीण गोंय जिल्लोधिकारी एग्ना क्लिटंस हांणी घडणुकेचो आढावो घेतलो. तशेंच पुलीस अधीक्षकूय घडणुके सुवातेर हजर आशिल्ले. ह्या स्फोटाक लागून ह्या वाठारांतल्या कांय घरांच्या वणटींक वेरो गेल्ल्याचें थळाव्यांनी सांगलें.
संबंदीत गुदांवां विशीं परवानगी आनी हेर कागदपत्रां पंचायती कडेन सादर करपाक सांगलां. जिल्लोधिकारी क्लिटंस हांणी सांगलें, ही घडणूक कित्याक घडली हाची खोलायेन चवकशी करतले. हे खातीर संबंदितांक विशेश सुचवण्योय दिल्यात. उजो कित्याक लागून लागलो, हाचे सयत हेर प्रस्नांच्यो जापोय पळोवणी अहवालांतल्यान मेळटल्यो.
मजगतीं, शुक्रारा सकाळीं घडणुके सुवातेर कसलोच वायट प्रकार घडचो न्हय, हाचे खातीर पुलीस बंदोबस्त दवरिल्लो. गोंय पुलिसांच्या फॉरेन्सिक पंगडान घडणुके सुवातेर दाखल जायत घडणुके विशीं म्हायती घेवपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
