भांगरभूंय | प्रतिनिधी
म्हापशें, प्रतिनिधी: बेतींत दुचाकी उजवे वटेन वळपाचो यत्न करतना पर्यटक बशीन धपको दिल्ल्यान सदानंद कृष्णा सुर्लीकार (६१, रा. बेती) हांकां मरण आयलें. ह्या प्रकरणांत पर्वरी पुलिसांनी बस ड्रायव्हर रत्नाकर नायक (४७, रा. केपें) हाचे आड सदोष मनुष्यवधाचो गुन्यांव नोंद केला.आयज सकाळीं १०.४० वरांचेर सुमाराक बेतीच्या कॅनरा बँके मुखार हो अपघात जालो.
सुर्लीकार जीए ०३ एएक्स १८२२ क्रमांकाचे ईव्ही दुचाकीन अपघात जाल्ले थळार आयिल्लो. बँकेत वचपाक उजवे वटेन वळटा आसतना मुखारल्यान येवपी जीए ०८ यू ४७८५ क्रमांकाच्या पर्यटक बसीन तांचे दुचाकीक धपको दिलो. ह्या अपघातांत सुर्लीकार हो रस्त्यार पडून गंभीर जखमी जालो आनी ताका सुवातेरुच मरण आयलें. उल्लेख केल्ली बस पर्यटक प्रवाशांक घेवन मडगांवां सावन कांदोळें वताली.
घडणुकेची म्हायती मेळटांच पर्वरे पुलीस उपनिरीक्षक सीताराम मळीक, सहाय्यक उपनिरीक्षक देवानंद रेडकार हांणी घडणुके सुवातेर वचून पंचनामो केलो. बस ड्रायव्हर रत्नाकर नायक हाका पुलिसांनी ताब्यांत घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
