भांगरभूंय | प्रतिनिधी
माशेल: तिवरें, वरगांव पंचायती उपरांत आतां बेतकी- खांडोळेंचे सरपंच विशांत नायक आनी उपसरपंच संजीवनी तळेकार हांचे आड अविश्वास नोटीस जारी केल्या. ताचेर ९ मदल्या ५ पंच वांगड्यांनी सयो केल्यात आनी ती प्रत फोंडें गटविकास अधिकारी कार्यालयांत सोमारा सादर केल्या. अविश्वास थारावाचेर पंच वांगडी मनोज कुमार गांवकार, निकिता फडते, उदय नायक, दिलीप नायक आनी श्रद्धा फडते हांच्यो सयो आसात.
उदरगतीच्या कामांत वा पंचायत संबंदी खंयचोय निर्णय घेतना पंच वांगड्यांक विस्वासांत घेवप ना, पंचायतींत विवीध कामां घेवन येवपी ग्रामस्थांक वेळ दिवप ना, अशीं विंगड विंगड कारणां सरपंच आनी उपसरपंचाचेर दाखल केल्ले नोटीसींत नमूद केल्यांत. विशेश म्हणल्यार दोन म्हयन्यां पयलीं सरपंच विशांत नायक आनी उपसरपंच संजीवनी तळेकार हांचे आड अविश्वास थाराव दाखल केल्लो आनी तो अपेशी जाल्लो. ताचे फाटल्यान थळावे आमदार गोविंद गावडे राजकीय रणनीती आशिल्ली.
हे पंचायतीचेर थळावे आमदार गोविंद गावडे हांच्या सर्मथक मंडळाचें वर्चस्व आसा. जिल्लो पंचायत वेंचणूक तोंडार आसतना तांकां हो व्हड धक्को बसला. फुडले सरपंच म्हणून दिलिप नायक आनी मनोजकुमार गांवकार हांच्या नांवांची चर्चा सध्या चल्ल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
