भांगरभूंय | प्रतिनिधी
माशेल: बेतकी-खांडोळें पंचायतींत सरपंच बदलाचें वारें फाटल्या कांय म्हयन्यां सावन सुरू आशिल्लें. विरोधी हे संदीची वाट पळयताले. बिरेस्तारा २६ जुनाक सरपंच विशांत नायक हांचे आड अविश्वास थाराव संमत केलो. उपसरपंचाचेरूय अविस्वास थाराव दाखल केलो. ताचेर सोमारा चर्चा जावपाची शक्यताय आसा. तेन्नाय विरोधी गट आयचे प्रमाणूच विरोधांत ठाम रावतले, असो आयज अविस्वास थाराव संमत जाले उपरांत पंच दिलीप नायक गटा वतीन सांगलें.
आयच्या अविस्वास थारावाचे चर्चेक ९ मदले ५ पंच वांगडी हजर आशिल्ले. सरपंच, उपसरपंच, हेर दोग पंच हजर रावंक ना. सरपंचा आड पांच पंच वांगड्यांनी मतां नोंद केलीं. पंच वांगडी मनोज गांवकार, दिलीप नायक, उदय नायक, निकिता फडते, श्रद्धा फडते हांणी आड मतां नोंद केलीं. गट विकास कार्यालया वतीन निरीक्षक म्हणून सोमनाथ तारी, गोकुळदास कुडाळकार हजर आशिल्ले.
भोम, माशेलांतूय बदल?
भोम-अडकोण, तिवरें-वरगांव (माशेल) पंचायत पांवड्यारूय सध्याच्या सरपंचा विशींच्या अविस्वास थारावा विशींच्या हालचालींक वेग आयला. हे पंचायतींतूय निश्चीतूच बदल जावपाचो आशिल्ल्यान हे विशीं माशेल, भोम-अडकोण पंचक्रोशींत चर्चा सुरू आशिल्ली. कांय पंच हे विशीं सहकार्यां कडल्यान सल्ले घेतात. हाका लागून ह्या दोनूय सरपंचांचेर अविश्वास थाराव दाखल जावपाची शक्यताय आसा.
सरपंच कोण?
खांडोळ्यां दिलिप नायक हांच्या गळ्यांत सरपंचपदाची माळ घालतले अशी खात्री आशिल्ल्या सुत्रां कडल्यान म्हायती मेळ्ळ्या. मात तिवरें- वरगांवां सरपंच कोण? हें निश्चीत जायना, कांय म्हयन्यां खातीरचें सरपंचपद वाटून घेवपाची चर्चा सूर आसा. वाटाघाटी येसस्वी जाल्यार कांय वरांनी हांगा अविस्वास थाराव दाखल जातलो. मात सत्ते खातीर विरोधकांत मतैक्य जायना. हाका लागून माशेलांत बदल लांबायेर पडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
