भांगरभूंय | प्रतिनिधी
सद्याक लोकांक गॅसा खतीर वणवणचें पडटा. तातूंत सरकारचे निर्णय लोकांक सामके गोंदळावन उडयतात.
तशें दर वर्सा मार्च म्हयन्यांत आमी गॅसाचेरूच आसतात म्हणल्यार जाता. आतां पयलीं वरी जाय तशे गॅस सिलिंडर मेळनात. गॅस कंपनींनी थारायल्या तितलेच सिलिंडर वर्साक मेळपाचे. खरें म्हणल्यार हे मेळटा ते गॅस सिलिंडर कोणाक पावनात. जाच्या घरांत स ते सात लोक रावतात तांकां अठरा ते वीस दिसांक एक सिलिंडर जाय पडटा. म्हणजेच वर्साक अठरा तरी सिलिंडर जाय पडले. तातूंत सरकारान जायत्या जाणांक फुकट कनेक्शनां दिवन सगल्यांकूच गॅसाचें पिशें लायिल्ल्यान चुली म्हणटात त्यो आतां ना जाल्यात. लांकडांय मेळप खूब कठीण आनी हाकाच लागून सगले गॅसाचेर अवलंबून रावंक लागल्यात. पूण सरकारान गॅस सिलिंडराचेर रेस्ट्रिक्शन घालां. वर्साक अमुकूच सिलिंडर मेळपाचे. एके वटेन सरकार स्वच्छ उर्जा म्हणून व्हडली जायरात करता आनी लोकांक गॅस वापरूंक सांगता. पूण लोकांक जाय तितले सिलिंडर मेळनात. म्हणटकूच कितें करपाचें लोकांनी?
पयलीं गॅसाचेर सबसिडी मेळटाली. हातूंत सरकारी तिजोरेचेर भार पडटालो. म्हणून रेस्ट्रिक्शन घालां तें समजूं येतालें. पूण आतां काय सरकार सबसिडी दिना. गॅस चड मोलाकूच घेवचो पडटा अशें आसतनाय जाय तितले सिलिंडर कित्याक मेळनात काय? आनी हाकाच लागून मार्च म्हयनो आयलो म्हणजे लोकांचेर कलकल येता. गॅस नासतना कसो काडप म्हयनो? म्हयनोभर कोण जेवनासतना रावतलो? आयज गॅस ही गरज जाल्या , तें फॉल्ग न्हय. आनी ह्या रेस्ट्रिक्शनाक लागून जाता कितें तर गॅस वितरकाचें फावता. तो सिलिंडर दिता पूण चड मोलान. सुमार दोनशें रुपया चड दिल्यार गॅस मेळटा. आनी तो ताच्या गुदांवार वचून हाडपाचो. सरकाराक लाव-लुकसाण कांयच ना, वितरक जोडटा. खरें म्हणल्यार सरकारान हें रेस्ट्रिक्शन काडून उडोवंक जाय वा घरांत जितलीं मनशां ते प्रमाण गॅस वितरण करपाक जाय.
सद्याक दुश्काळांत तेरावो म्हणटात तसो लागला. ट्रम्पान गरज नासतना लोकांचेर झूज लादलां. कारणां कितेंय आसूं, झूज कोणूय जिखूं सामान्य लोक हुलपतात. सद्याक लोकांक गॅसा खतीर वणवणचें पडटा. तातूंत सरकारचे निर्णय लोकांक सामके गोंदळावन उडयतात आनी लोकांच्या मनांत भंय निर्माण करतात. सद्याक गॅस वितरकांच्या दारांत लागपी लायनींक सरकारूच जबाबदार म्हणचें पडटलें. सरकाराचे निर्णय दर दोन दिसांनी बदलतात. सद्याचो गॅस तुटवडो हो झुजाक लागून जाला म्हणपाचें सगलेच जाणात. म्हणटकूच अश्या वेळार हाचेर कितें तरी उपाय काडूंक जाय आसलो. पूण सरकार कितें करता तर दर दोन दिसांनी वेगळें निवेदन दिता. जाका लागून लोकांचो सरकार वेलो विस्वास उडला. एक दीस सरकार सांगता गॅसाचो तुटवडो ना. दुसरेच दीस सरकार म्हणटा, म्हयनो भर पावतलो इतलो गॅस आसा. तिसऱ्या दिसा सरकार म्हणटा पंदरा दिसांक पाव सारको गॅस आसा. म्हणजेच एका दिसान पंदरा दिसांचो गॅस सोंपता. पूण प्रत्यक्षांत वितरक हात वरशे करून बसल्यात. तांचे कडेन एकूय सिलिंडर ना. म्हणटासर सांगता कमर्शीयल गॅसाचें वितरण बंद जातलें. घरगुती गॅस मेळटले.
आतांच हॉटेलां आनी हेर कमर्शीयल आस्थापनां दोळ्यांक उदक लावपा पुरते कमर्शीयल सिलिंडर घेतात. तांचो सगलो धंदो घरगुती सिलिंडरांचेर चलता हें सत. खंयच्याय हॉटेलाच्या किचनांत वचून पळोवचें. आनी आतां जर सरकारूच कमर्शीयल सिलिंडर मेळचो ना म्हणटा जाल्यार घरगुती सिलिंडरांचेर कितलो ताण येतलो तें सांगपाची गरज ना. देखून तर वितरकांच्या दारांत लायनी लागल्यो न्हय. आनी वितरकांनी सिलिंडर ना म्हणत जाय तसो धंदो केलो. सद्याक सरकार सांगता फाटलो सिलिंडर मेळ्ळा ताच्या पंचवीस दिसां उपरांत बुकींग करूंक मेळटलें. वयर सांगलां ते प्रमाण जर कोणाकूय अठरा दिसांनी सिलिंडर लागता तर ताणें फुडले सात दीस उपाशी काडचे पडले वा दुसरो पर्याय सोदचो पडलो. बरें बूक केलो म्हूण रोखडोच सिलिंडर मेळटलो म्हूण आसा? खात्री दिवं नजो. स्टॉव्ह घेवन रांदतले म्हणल्यार केरोसीन केन्ना बंद जालें. चुली पेटयतले म्हणल्यात फ्लॅटांत तें शक्य जातलें? गांवगिऱ्या वाठारांनी चुली बंद करूंक लायल्यो आनी तांकां गॅस वांटले. आतां तांची परिस्थिती कितें? कशें जगपाचें लोकांनी? पेत्रोल मेळ्ळें ना जाल्यार घरा बसून काम करूं येता – वर्क फ्रोम होम. पूण जेवणाचें कितें हो प्रस्न उरताच. गॅस नासतना जेवण कशें शिजतलें? लायटीची मजत घेतले म्हणल्यार चड वीज वापरल्यार दंड पडटलो म्हणपाचें वीज मंत्र्यान जाहीर केलां. कांय जाणांक बिला वांगडा दंड आयलाय म्हणपाचें आयकूंक येता.
गॅस तुटवड्या खातीर सरकाराक दोश दिवन उपकारचो ना. कारण परिस्थिती कोणाच्याच हातांत ना. सरकार आपले परीन यत्न करता. हें जरी खरें आसलें तरी सरकारन दर दिसा असलें हांसूंक येवपा सारकें वक्तव्य करचें न्हय आनी लोकांक दुबावांत उडोवचे न्हय अशेंच सांगन दिसता. जें कितें सत आसा तें लोकां मुखार येवप बरें. आनी हें संकश्ट सोससर सरकारान लायटीचे दर मात्शे उणे करून लोकांक थाकाय दिवपाची गरज आसा. कांय जाण तरी विजेचीं उपकरणां वापरून गॅसाचो उपयोग उणो करतले. तशेंय म्हणून वीज खातें सदांच लुकसाणेंत चलपाचें. तांच्या ऑफिसाक हुंदीर लागल्यात म्हणपाचें वीज मंत्र्यानूच सांगलां. हे हुंदीर ना जायना तो मेरेन लुकसाण उणें कशें जातलें. पूण सद्याचे परिस्थितींत लोकांक थाकाय मेळप गरजेचें. देखून बेगिनांत बेगीन वीज बिलाच्यो दरी उण्यो करच्यो आनी तो दंड बी काडून उडोवचो. झूज सोंपूं दी मागीर आसाच सगलें.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
