भांगरभूंय | प्रतिनिधी
सरकारी मुळाव्या, माध्यमीक शाळांनी 700 परस चड शिक्षक पदां रितींपणजीः सध्या प्राथमीक ते उच्च माध्यमीक मेरेन सरकारी शाळांनी 700 परस चड शिक्षक पदां रितीं आसात. सोमारा आमच्या प्रतिनिधी कडेन उलयतना शिक्षण संचालक शैलेश झिंगडे हांणी ह्या मुळाव्या आनी माध्यमीक पदांतलीं सुमार 216 पदां भरपाचे प्रस्ताव ह्या म्हयन्यांत कर्मचारी भरती आयोगा कडेन सादर करतले अशी म्हायती दिली.
फाटल्या म्हयन्यांत सरकारी मुळाव्या शाळांनी 150 शिक्षक भरपा खातीर परिक्षा घेवपाचो प्रस्ताव खात्यान कर्मचारी भरती आयोगा कडेन सादर केल्लो. हे खेपे शाळांनी शिक्षकां खातीर रितीं आशिल्लीं 126 पदां भरपा खातीर प्रस्ताव सादर करतले. ते भायर मुळाव्या शाळांतल्या सुमार 90 शिक्षकांक शाळांनी सहाय्यक शिक्षक म्हणून बडटी दितले. देखून मुळाव्या शाळांनी ही पदां रिती जातलीं. त्या पदां संबंदी एक प्रस्तावूय ह्या म्हयन्यांत आयोगा कडेन सादर करतले आनी तीं बेगोबेग भरतले अशें झिंगडे हांणी सांगलें.
सरकारी खात्यांतल्या ‘सी’ वर्गांतलीं रितीं पदां भरपा खातीर राज्य कर्मचारी आयोगान फाटल्या डिसेंबर सावन परिक्षा घेवपाक सुरवात केली. आतां मेरेन आयोगान तेरा परिक्षा घेतल्यात. कांय म्हयन्यां आदीं आयोगान सगल्या खात्याच्या मुखेल्यां कडल्यान रिकाम्या पदांची वळेरी मागयिल्ली. ते प्रमाण सरकारी मुळाव्या पांवड्यार सुमार 150 शिक्षकांची रितीं पदां भरपाचो प्रस्ताव शिक्षण खात्यान आयोगा कडेन सादर केल्लो. ते उपरांत 216 जाग्यांचो प्रस्ताव सादर करतले. फुडल्या काळांत आयोग टप्प्या टप्प्यान परिक्षा घेतले. ते उपरांत हीं पदां भरतले असोय उल्लेख तांणी केला.
……………………………………….
शाळांचेर परिणाम जाल्ल्यान प्रक्रिया नेटान
राज्यांतल्या जायत्या सरकारी मुळाव्या आनी माध्यमीक शाळांनी शिक्षकांचो व्हड उणाव आसा. ताचो परिणाम विद्यार्थ्यांच्या शिक्षणाचेर जावपाक लागला. ताका लागून थंय शिकपी जायते विद्यार्थी खाजगी शाळां कडेन वचपाक लागल्यात, जाका लागून सरकारी मुळाव्यो शाळा आनी म्हाविद्यालयां बंद जाल्यात. हाचेर नियंत्रण दवरपा खातीर शिक्षण खातें बेगोबेग रितीं पदां भरपाचे यत्न करता अशी म्हायती सुत्रांनी दिली.
…………………………………….
आयोगान जायत्या जाणांचें शिक्षक जावपाचें सपन जागयलां
– प्राथमीक आनी माध्यमीक शिक्षक जावपा खातीर पदवी मेळयिल्ले हजारांनी विद्यार्थी सध्या बेकार आसात. तांची भरती आतां कर्मचारी भरती आयोगा वरवीं संगणक आदारीत पद्दतीन सुरू आसा. ही परिक्षा पारदर्शकपणान जातात म्हणून आयोगान आतां मेरेन केल्ल्या परिक्षांक राज्यभरांतल्या विद्यार्थ्यांचो उपाट प्रतिसाद मेळपाक लागला.
– फुडल्या कांय म्हयन्यांत मुळाव्या आनी माध्यमीक शाळांनी रितीं आशिल्लीं सगळीं 700 परस चड पदां भरपाचो निर्णय शिक्षण खात्यान घेतला. कितल्याशाच तरणाट्या बायलांचें शिक्षक जावपाचें सपन साकार जावपाचें आसा
– एका वेळार धा हजार विद्यार्थी कर्मचारी भरती आयोगाचे परिक्षेक हाजीर रावपाक मेळटलें अशी वेवस्था तयार करतले अशें मुख्यमंत्री डॉ. प्रमोद सावंत हांणी कांय दिसां आदीं सांगिल्ले. देखून अशी वेवस्था बेगीन सुरू केल्यार अंदूं सगळ्यो प्राथमीक आनी माध्यमीक सुवाती भरपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
