भांगरभूंय | प्रतिनिधी
मुख्यमंत्र्यांचे तिरूमलाच्या प्रतिनिधींक निर्देश
– पयशें काडपा खातीर ठेवीदारांची गर्दी
– ऑडीट अहवाल, कागदपत्रांची पळोवणी केल्या उपरांत फुडलो निर्णय
पणजी : ऑडीट अहवाल तशेंच सहकार निबंधकांनी मागिल्लीं कागदपत्रां बेगिनात बेगीन सादर करपाचे निर्देश मुख्यमंत्री डॉ. प्रमोद सावंत हांणी तिरूमला तिरूपती सोसायटीच्या संचालक/प्रतिनिधी मंडळाक दिल्या. ऑडीट अहवाल आनी कागदपत्रांची पळोवणी केल्या उपरांत फुडलो निर्णय जातलो, अशें मुख्यमंत्र्यांनी चर्चेत स्पश्ट केलां. इतले मजगती एनओसी रद्द केल्या उपरांत राज्यांतल्या खातेधारकांनी पयशें काडपा खातीर फांट्यांनी गर्दी केली. खातेधारक आनी गुंतवणूकदारा मदीं सोसायटी विशीं दुबावाचें वातावरण तयार जालां.
तिरूमला तिरूपती सोसायटीक गोंयांत 13 जाग्यांचेर फांटे सुरू करपा खातीर दिल्ली एनओसी रद्द करपाचो आदेश मंगळारा जारी जालो. ह्या आदेशा उपरांत राज्यांतल्या सहकार वाठारांत खवदळ निर्माण जाली. बुधवारा दीसभर पणजे सयत सगळ्या फांट्यांनी गर्दी आशिल्ली. कर्मचाऱ्यां कडेन सोसायटी विशी चवकशी करतना बरेच जाण विड्रॉवल स्लीपी भरतना दिसताले. तिरूमला तिरूपती मल्टीस्टेट सहकारी सोसायटीन फाटल्या बऱ्याच वर्सांचो ऑडीट अहवाल सादर करूंक ना. सहकार निबंधकांनी तांकां नोटिसो जारी केल्यो. ह्या नोटिसांक लेगीत तांणी प्रतिसाद दिवंक ना. सहकार निबंधक कार्यालयाचे अधिकारी कागदपत्रां तपासपाक गेल्ले त्या वेळार लेगीत सोसायटीन सहकार्य करूंक ना. सोसायटीच्या अर्थीक स्थिती विशी सरकाराक कसलीच म्हायती नाशिल्ल्यान सरकारान मंगळारा 13 शाखो उक्त्यो करपा खातीर दिल्ली एनओसी रद्द केली. हाचे उपरांत सोसायटीच्या संचालक आनी प्रतिनिधींनी बुदवारा मुख्यमंत्री डॉ. प्रमोद सावंत हांची भेट घेतली. एनओसी रद्द करपाचो निर्णय फांटी घेवपाची मागणी सोसायटीच्या प्रतिनिधी मंडळान केली. सहकार निंबधकांनी हे पयली नोटिसो जारी करून जी कागदपत्रां मागल्या ती जाता तितली बेगीन सादर करपाक आपणे सांगला. ऑडीट अहवाल तशेंच कागदपत्रां सादर केल्या उपरांत तांची पळोवणी जातली. हाचे उपरांत सोसायटीच्या एनओसी विशीं निर्णय जातलो, अशें मुख्यमंत्री डॉ. प्रमोद सावंत हांणी सांगलें.
मजगतीं, सहकार मंत्री सुभाष शिरोडकार हांणी लेगीत मुख्यमंत्री डॉ. प्रमोद सावंत हांची भेट घेवन ह्या विशयाचेर चर्चा केली.
—————
सोसायटीच्या अर्थीक स्थितीची
सरकाराक म्हायती ना : सुभाष शिरोडकार
तिरूमला तिरूपती सोसायटीक 2023, 2024 आनी 2025 वर्सा नोटिसो जारी केल्यो. हे नोटिशीक तांणी कसलोच प्रतिसाद दिवंक ना. सोसायटीन ऑडीट अहवाल लेगीत सादर करूंक ना. हाका लागून एनओसी रद्द करपाचो निर्णय सरकारान घेतलो. सोसायटीन ऑडीट अहवाल आनी हेर कागदपत्रां सादर केले उपरांत अर्थीक स्थितीची म्हायती सरकाराक मेळटली. हाका लागून सध्या तरी सोसायटीच्या स्थितीचेर भाश्य करपाक ये ना, अशें सहकार मंत्री सुभाष शिराडकार हांणी सांगलें.
—————
एनओसी रद्द करपाचो निर्णय
फाटीं घेवपाची मागणी करपी पत्र
सोसायटीची एनओसी रद्द करपाचो आदेश फाटीं घेवचो, अशें पत्र तिरूमला सोसायटीच्या पणजी फाट्यान सहकार निबंधकांक बरयलां. हे फुडें सोसायटी सगलीं कागदपत्रां वेळेत सादर करतली, अशें पत्र पणजी फांट्याचे प्रतिनिधी दिप्तेश सावंत हांणी सहकार निबंधकांक बरयलां. कागदपत्रां सादर करूंक नाशिल्ले खातीर फांट्यान दिलगिरी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
