भांगरभूंय | प्रतिनिधी
सांगेंः देशांत आयज बेकारी आनी म्हारगाय वाडत आसा. मात ह्या संकश्टांचेर उपाय काडपाक, तशेंच गोंयचो खण वेवसाय सुरू करपाक भाजप सरकाराक अपेस आयलां अशें विरोधी पक्ष फुडारी युरी आलेमांव हांणी काल कुडचड्यार जाल्ल्या ‘संविधान बचाव अभियानाचे’ बसकेंत म्हणलें.
कुडचडें, सांवड्डें आनी सांगें ह्या तीन मतदारसंघांतले काँग्रेस कार्यकर्ते आनी तांचे समर्थक हजर आशिल्ले. गोंय प्रदेश काँग्रेस समितीचे अध्यक्ष अमीत पाटकार, खासदार विरियातो फेर्नांडीस, केपेंचे आमदार ॲल्टन डिकॉस्ता, डॉ. प्रतिक्षा खलप, नितीन चोपडेंकार, गोंय प्रदेश युवा काँग्रेसीचे कार्यकारी अध्यक्ष महेश नादार आनी हेर मानेस्त ह्या वेळार हजर आशिल्ले.
“लोकांचो प्रतिसाद पळयल्यार लोकांक आयज बदल जाय हें स्पश्ट आसा. लोकांनी आयज आपलीं गाराणीं जे तरेन मांडलीं तें पळयल्यार ते भाजप सरकाराच्या कारभाराचेर रागार आसात आनी तांकां खरेंच बदल जाय हें कळटा. लोकांनी आयज सादूर रावपाची गरज आसा, कित्याक तर सत्तेर आशिल्लो पक्ष लोकां मदीं धर्माच्या नांवार फूट घालता. तांचे हे यत्न आमी नश्ट करुंक जाय,’’ अशें युरी आलेमांव हांणी म्हणलें.
‘‘आयज आमच्या तरणाट्यां मुखार आशिल्लीं आव्हानां आनी गोंयांत शांतताय राखपाक भाजपा सरकाराक अपेस आयलां. कायदो आनी सुवेवस्था दिसान दीस सोंपत आसा. लोकशाय सोंपोवन उडोवपाचो यत्न भाजप सरकार करता. हे खातीर आमी सगल्यांनी एकठांय रावून आमचें गोंय आनी भावचार राखपाक जाय,’’ अशें काँग्रेसचे फुडारी आनी कुंकळ्ळेचे आमदार युरी आलेमांव हांणी म्हणलें.
‘‘खण वेवसय परतून सुरू करपा विशीं भाजपा प्रशासनान लोकांक फटयल्यात. ह्या वाठारांतले लोक ह्या उद्देगाचेर चड आदारून आशिल्ले. आयज तांणी ह्या हुस्क्याचो पुनरुच्चार केलो आनी आमी तांकां थाकाय दिवपाचें उतर दिलां. तशेंच सागरमाला प्रकल्पा खाला सांवड्ड्यां येवपी प्रस्तावीत जेटी हाकाय लोकांनी विरोध उक्तायला,’’ अशें तांणी खबरांकारां कडेन उलयतना सांगलें.
‘‘आतां मेरेन सामान्य मनशाचो फायदो घेवन लोकशाय दुबळी करपाचे आनी स्वताच्या फायद्या खातीर पक्षांतरांक उर्बा दिवपाचे भाजपाचे यत्न दरेक गोंयकाराक समजल्यात. आमकां मेळपी बळिश्ट तेंको आमकां जैता कडेन व्हरतलो, आनी काँग्रेस येसस्वी पुनरागमन करतली असो म्हाका विस्वास आसा. कुडचडें, सांवड्डें आनी सांगें हांगासरल्या निश्ठावान काँग्रेस समर्थक आनी कार्यकर्त्यांनी केल्ल्या निश्ठावान बांधिलकी खातीर हांव तांचे मनापासून उपकार मानतां,’’ अशें तांणी मुखार म्हणलें.
ह्या वेळार अमीत पाटकार, खासदार विरियातो फेर्नांडीस आनी हेर फुडाऱ्यांचीं उलोवपां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
