भांगरभूंय | प्रतिनिधी
रोहन खंवटेः फ्लॅटांनी रावपी धनी काय पर्यटक तें कळपाक कठीण
पणजीः राबितो इमारतींनी बेकायदो रितीन चलिल्ल्या ‘होम स्टे’ आड कारवाय करपाक पर्यटन खातें वचनबद्ध आसा. जे ऑनलाय ट्रेव्हल एजन्सी (ओटीए) होम स्टे बुकींग करतात तांची नोंदणी पर्यटन खात्या कडेन करपाक सांगलां. ते भायर हे होम स्टेक लागून थळाव्यांक त्रास जातात आसत जाल्यार तांणी 1364 ह्या पर्यटन खात्याच्या हॅल्पलायनीचेर संपर्क करचो अशी म्हायती पर्यटन मंत्री रोहन खंवटे हांणी दिली.
राबितो इमारती आनी सहकारी राबितो सोसायटींनी अनियंत्रीत होम स्टेचो विशय कळंगूटचे आमदार मायकल लोबो हांणी शुन्य प्रहरा वेळार मांडिल्लो.
एका राबितो इमारतींत 50 फ्लॅट आसात जाल्यार तातूंत बेकायदेशीर रितीन 10 होम स्टे चलतात. ह्या होम स्टेक लागून इमारतीच्या थळाव्या लोकां मदीं हुस्क्याचें वातारवण निर्माण जालां. ह्या राबितो सोसयाटी भितर फ्लॅटांनी हे पर्यटक रावतात. सोरो पियेवन खंयच्या खंय आपल्यो गाडयो पार्क करून रस्तो आडयतात. मेळटा थंय बसून सोरो पियेवन थळाव्यांक अडचण करतात अशी कागाळ लोबो हांणी करून हे होम स्टे आड कारवाय करपाची मागणी केली.
हे विशीं जाप दितना पर्यटन मंत्री रोहन खंवटे हांणी सांगलें, चडश्या राबितो इमारतींनी दिल्लीच्या लोकांनी आपले दुसरें घर घेतलां. देखून ह्या फ्लॅटांनी रावपी धनी काय पर्यटक तें कळपाक कठीण जालां. आमी ओटीएचेर नोंद आशिल्ले होम स्टेचेर बारीक नदर दवरून आसात. तशेंच ओटीएचेर लिंक आशिल्ले सगले हॉटेल रूम, गेस्ट हावस आनी हेर रावपाच्यो सुवाती पर्यटन खात्या कडेन नोंद आसात हाची काळजी आमी घेतल्या अशें खंवटे हांणी सांगलें.
सहकार निबंधकांक हे विशीं विस्वासांत घेवपाक जाय. जर अनियंत्रीत राबितो वेवसाय तांचे मुखार दिसून आयलो जाल्यार सोसायटींनी जागृत रावन पर्यटन खात्याचो टॉल फ्रि क्रं. 1364चेर कागाळ दाखल करची. हो विशय सुटावो करपा खातीर आमी पालिका आनी पंचायती वांगडा मेळून काम करीत आसात. हो विशय आमी गंभीर घेतला आनी मुख्यमंत्र्या बरोबर आमी शाश्वत उपाय सोदपा खातीर काम करतले जेणेकरून थळावे आनी पर्यटन क्षेत्राचे हीत जपपाक मजत जातली, अशें खंवटे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
