भांगरभूंय | प्रतिनिधी
मुख्यमंत्री: गोंयच्यान बेकायदो सोऱ्याची येरादारी करची न्हय
मडगांव: बेकायदो सोऱ्याचे येरादारीचेर कारवाय करतात. पुलीस खातें तशेंच अबकारी खात्या कडल्यान बेकायदो सोऱ्याच्या येरादारीच्या प्रकारांचेर नदर दवरून आसात. ताका लागून गोंया भायलो सोरो गोंयांत आनी गोंयचो सोरो गोंया भायर बेकायदो व्हरूंक मेळचो ना. हाचे मुखार कारवाय जायत रावतली अशें मुख्यमंत्री डॉ. प्रमोद सावंत हांणी सांगलें.
दोन दिसां पयलीं बेकायदो सोऱ्याच्या सांठ्याचेर कारवाय केल्ली. हाचेर उलयतना मुख्यमंत्री डॉ. प्रमोद सावंत हांणी सांगलें की, गोंयच्यान बेकायदो सोऱ्याची येरादारी करची न्हय हे खातीर खर कारवाय करतले. गरजेच्या त्या सगल्या नाक्यांचेर बेकायदो सोऱ्याचे येरादारीचेर लक्ष दवरतात. तांचेर वेळावेळार कारवाय जायत आसा आनी हाचे मुखारूय सुरूच उरतली. गोंयचीं दुकानां गोंया भायले लोक चलयतात अशें विचारतकच, गोंयकारांनी गोंया भायल्या लोकांक दुकानां चलोवपा खातीर दिल्ल्याचें मुख्यमंत्र्यांनी सांगलें.
पाकिस्तान झिंदाबादच्या बोर्डा विशीं उलयतना ते बोर्ड लावप्यांचेर रोखडीच कारवाय केली. त्या दुकानदारांनी कसलीच परवानगी घेनासतना बोर्ड लायिल्ले. ताका लागून तांचेर कारवाय केल्या अशें मुख्यमंत्र्यांनी सांगलें.
एडबर्ग परेरा मारपेट प्रकरणांत मुख्यमंत्र्यांनी सांगलें की, ह्या प्रकरणांत खात्या खाला चवकशी सुरू आसा. तशेंच एका पुलिसाचेरूय कारवाय केल्या. चवकशी जाले उपरांत गरजेची ती कारवाय नक्कीच करतले अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
