भांगरभूंय | प्रतिनिधी
मडगांव सुरक्षा दळाची कारवाय
मडगांव: मडगांव रेल्वे स्टेशनार बेकायदो सोऱ्याच्या बाटल्या सयत दुबावीत धर्मेश कुमार पटेल (46, रा. भरूच, गुजरात) हाका मडगांव रेल्वे सुरक्षा दळान ताब्यांत घेतला. ताचे कडल्यान 23 हजारांचो गोंय बनावटीचो सोरो जप्त केला. फुडले कारवाये खातीर ताका अबकारी खात्याचे सुवादीन केला.
मडगांव रेल्वे स्टेशना वेल्यान जावपी बेकायदो सोऱ्याची येरादारी मडगांव रेल्वे सुरक्षा दळान उक्तडार हाडल्या. पोरबंदर एक्सप्रेस गाडी येवचे पयलीं रेल्वे स्टेशना वेल्या फलाट क्रमांक एकाचेर रेल्वे सुरक्षा दळाचो हेड कॉन्स्टेबल विनोद खोसारे हांणी ताची चवकशी केली. ताका वेवस्थीत जाप दिवंक येवंक नाशिल्ल्यान ताचे कडल्या सामानाची तपासणी केली तेन्ना सोरो सांपडलो.
बेकायदो रितीन सोऱ्याचे तस्करी प्रकरणांत रेल्वे सुरक्षा दळान दुबावीत धर्मेश पटेल हाका ताब्यांत घेतला. ताचे कडल्यान 23190 रुपयांच्या विवीध ब्रँडाच्यो सोऱ्याच्यो बाटल्यो जप्त केल्यात. गोंय बनावटीचो सोरो रेल्वेंतल्यान गुजरातांत व्हरून थंय चड मोलान विकपाच्या हेतान सोऱ्याची तस्करी जायत आशिल्ल्याचें चवकशीत मुखार आयलां. उपरांत फुडले कारवाये खातीर जप्त केल्ल्या सोऱ्याच्या सांठ्या सयत दुबाविताक अबकारी खात्याच्या अधिकाऱ्यांचे सुवादीन केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
