भांगरभूंय | प्रतिनिधी
मांद्रें पंचायतीची नोटीस; स्वता मोडपाचें वेवसायिकांनी लेखी दिल्लें उतर
भांगरभूंय । प्रतिनिधी
पेडणें: मांद्रें पंचायत वाठारांतल्या आश्वें मांद्रें आजोबा देवळाच्या वाठारांत अरूण भल्ला, रोहीत खेर आनी अनील शर्मा ह्या बिगर गोंयकारांनी जमीन विकत घेवन सर्वे क्र. 211/ 2 ए हे जमनींत बेकायदो बांदकाम उबारलां. तातूंत कॉटेजीस रॅस्टोरंण्ट बांदलां. हें बांदकाम 15 दिसां भितर मोडचें, अशी नोटीस मांद्रें पंचायतीन संबंदीत बांदकाम वेवसायिकांक जारी केल्या. आश्वें मांद्रेंच्या आजोबाच्या देवळाच्या वाठारांतली जमीन मूळ धनयान देवळा सयत चुकीचे म्हायती वरवीं सत्यम ठकराल हाका विकिल्ली. ते उपरांत सत्यम ठकराल हांणी ती जमीन वयल्या तिनूय वेवसायिकांक विकतना देवळा खातीर देड हजार चौखण मिटर जमीन फुकट सोडल्या. तेच संबंदान सत्यम ठकराल 8 फेब्रुवारीक मांद्रें पंचायतींत आयले आनी तांणी हे जमनी कडेन आपलो कसलोच वेव्हार नाशिल्ल्याचें सांगलें. तशेंच आपणे ती जमीन विकल्या अशेंय स्पश्ट केलें. मांद्रें पंचायतीन दोन म्हयन्यां आदीं त्या बांदकामांक नोटीस जारी करून काम बंद करपाचो आदेश दिल्लो. ते उपरांत वयल्या तिनूय वेवसायिकांनी तें बांदकाम आपूण स्वता मोडटले, अशें लेखी दिल्लें. पूण अजून मेरेन तें बांदकाम मोडूंक नाशिल्ल्यान परतून एकदां 9 फेब्रुवारीक मांद्रें पंचायतीन त्या बांदकामांक नोटीस जारी करून तीं 15 दिसां मोडपाक सांगलां. संबंदितांनी तीं आपूण जावन मोडलीं नात जाल्यार पंचायत मंडळ तें बांदकाम मोडटलें आनी ताचो खर्च वेवसायिकां कडल्यान वसूल करतले, अशें नोटीशेंत म्हणलां.
परवान्यांचो गैरवापरः सरपंच
आजोबा देवळाच्या वाठारांत सीआरझॅड नेम मोडून व्हड प्रमाणांत बांदकामां केल्यांत. सीआरझॅड विभागा कडल्यान हंगामी स्वरुपाचें बांदकाम करपा खातीर परवाने घेतल्यात, पूण वेवसायिकांनी ह्या परवान्यांचो गैरवापर करून पक्की बांदकामां करपाचो यत्न केला. त्या बांदकामाची पळोवणी करून पंचायतीन संबंदीत अहवाल हे आदींच पेडणें गटविकास अधिकारी, उपजिल्होधिकारी आनी सीआरझॅड विभाग हांकां धाडला. ते प्रमाण 9 फेब्रुवारीक मांद्रें पंचायतीन ते बांदकाम मोडपा खातीर नोटीस जारी केल्या, अशें सरपंच अॅड. अमीत सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
