भांगरभूंय | प्रतिनिधी
पणजी : बेकायदो बांदकामां विशीं उच्च न्यायालयान जो आदेश दिला, ते प्रमाण कारवाय जातली, अशें मुख्यमंत्री डॉ. प्रमोद सावंत हांणी स्पश्ट केलें. राष्ट्रीय महामार्ग तशेंच राज्य महामार्गा लागसार आशिल्ल्या बेकायदो वेवसायीक आस्थापनांक नोटीसो जारी करतले. स्थलांतरा खातीर 15 दिसांची मुजत दितले. उपरांत आदेशा प्रमाण कारवाय जातली अशें मुख्यमंत्री डॉ. प्रमोद सावंत हांणी सांगलें.
बेकायदो बांदकामां विशीं उच्च न्यायालयान दिल्ल्या आदेशाचेर कारवाय करपाक मुख्यमंत्र्यांनी उच्चाधिकार समितीची बसका घेतली. हे बसकेक महसूल मंत्री बाबूश मोन्सेरात, पर्यावरण मंत्री अालेक्स सिक्वेरा, पर्यटन मंत्री रोहन खंवटे, खात्यांचे सचीव आनी अॅडव्होकेट जनरल देविदास पांगम हजर आशिल्ले.
रस्त्या कुशीक आशिल्ल्या बेकायदो बांदकामां सयत कोमुनिदाद आनी सरकारी जमिनींतलीं बेकायदो बांदकामां सरकार सोंसून घेवचें ना. कोणूय 100 क्रमांक डायल करून बांदकामां विशीं पुलिसांक कागाळ करपाक शकता. जिल्लोधिकारी कार्यालया वरवीं बेकायदो बांदकामांचेर कारवाय करतले. उच्च न्यायालयाच्या आदेशाचो सरकार अभ्यास करतलें. उच्च न्यायालयाच्या आदेशा प्रमाण सगल्यांत पयलीं महामार्गा लागसार 15 मिटर अंतराचेर आशिल्ल्या आस्थापनांक नोटीसाे जारी करतले.
बेकायदो बांदकाम आनी नेमान नाशिल्लीं बांदकामां, हे दोन वेगळे प्रकार. नेमान नाशिल्लीं बांदकामां नेमान करपा खातीर कायद्याचो अभ्यास करतले. हे खातीर कायदेशीर सल्लो दिवपी एजन्सीची (लॉ फर्म) नेमणूक करतले. अभ्यास करून कायद्यांत दुरूस्ती करतले. येवपी अधिवेशनांत दुरूस्ती विधेयक हाडले, अशें डॉ. सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
