भांगरभूंय | प्रतिनिधी
साडेपांच हजारां परस अदीक अर्ज प्रलंबीत; फक्त देड हजार अर्जांक मान्यताय
भांगरभूंय । प्रतिनिधी
पणजी : गोंय अनधिकृत बांदकाम कायद्याखाला बांदकामां नियमीत करपा खातीर आयिल्ल्या 10 हजार अर्जां मदले 3 हजार अर्ज सरकारान भायरायले. अर्ज भायरावपाचें प्रमाण 30 टक्के जाता. साडेपांच हजारां परस चड अर्ज प्रलंबीत आसा, अशी म्हायती सरकाराच्या गोपां कडल्यान मेळ्ळी. आतां मेरेन फक्त देड हजार अर्जांक मान्यताय दिल्या.
कोणे एकल्यान रुपांतरणाची सनद, बांदकाम परवानो वा संबंदीत पंचायत/ पालिकेची एनओसी घेनासतना 28 फेब्रुवारी 2014 पयलीं बांदकाम केलें जाल्यार तें नियमीत करपा खातीर सरकारान गोंय अनधिकृत बांदकाम नियमीत कायदो संमत केलो. सरकारान सगळ्यांत पयलीं 2016 त हो कायदो संमत केलो. अर्ज सादर करपा खातीर सुरवेक 210 दिसांची मुजत आशिल्ली. मुजत सोंपल्या उपरांत सरकार मुजतवाड दीत रावलें. हाचे उपरांत 2023 त सरकारान कायद्यांत दुरुस्ती केली. हाचे खातीर गोंय अनधिकृत बांदकाम नियमीत दुरुस्ती विधेयक संमत केलें. मात 28 फेब्रुवारी 2014 पयलींचींच बांदकामां नियमीत करपाची तजवीज कायम दवरली. हे तारखेंत बदल जावंक ना. विहीत नमुन्यांत शुल्का सयत अर्ज भरून ते मामलेदार/ उपजिल्होधिकारी कार्यालयांत सादर केल्या उपरांत ह्या अर्जांचेर निर्णय घेवपाची तजवीज आसा.
अर्जा सयत उदक वा विजेचें बील, आधार कार्ड, वेंचणूक वळख पत्र, रेशन कार्ड, टेलिफोन बील, एक चवदाचो उतारो सादर करप गरजेचें आसा. सगळीं बिलां 28 फेब्रुवारी 2014 पयलींचीं आसपाक जाय. सरकारी खात्या कडल्यान नोटीस आयली जाल्यार ती लेगीत सादर करपाक हरकत ना. एखाद्या बांदकामाच्या जाग्याच्या मालकी हक्का संबंदी न्यायालयांत याचिका आसली जाल्यार त्या अर्जांचो विचार जावचो ना. अशे अर्ज भायरावपाची तजवीज आसा. दुरुस्ती कायदो संमत जाले उपरांत अर्ज करपा खातीर पयलीं 180 दिसांची मुजत आशिल्ली. ही मुजत सोंपल्या उपरांत 90 दिसांची मुजत दिली. ही मुजत सोंपल्या. हाका लागून हे फुडें आनीक अर्ज स्विकारचे नात.
अभयारण्य, सीआरझॅड, नो डॅव्हलोपमेंट झोन, ओपन स्पेस, भौशीक जमीन ह्या जमनीं वयलीं बांदकामां ह्या कायद्याखाला नियमीत जावची ना, हें कायद्यांत पयलींच स्पश्ट आसा. तशेंच कितल्या आकाराचें बांदकाम नियमीत जातलें, ताचें क्षेत्रफळ लेगीत निश्चीत केलां.
पुराय गोंयांत मेळून अनधिकृत बांदकामां नियमीत करपा खातीर 10,184 अर्ज आयले. तातूंतले 1,509 अर्जांक मान्यताय मेळ्ळी. 3,092 अर्ज भायरायले जाल्यार 5,583 अर्ज प्रलंबीत आसात. बांदकामां नियमीत करपा खातीर उत्तर गोंयांत 5,079 जाल्यार दक्षीण गोंयांत 5,105 अर्ज आयले. उत्तर आनी दक्षीण गोंयचो विचार केलो जाल्यार दोनूय जिल्ह्यांत लागीं लागीं सारकेच अर्ज आयल्यात. उत्तर गोंयांत 777 जाल्यार दक्षीण गोंयांत 732 अर्जांक मान्यताय मेळ्ळ्या. अर्जांक मान्यताय मेळपाचें प्रमाण लेगीत दोनूय जिल्हयांत सारकेंच आसा. उत्तरेंत 604 जाल्यार दक्षीणेंत 2,488 अर्ज भायरायल्यात. अर्ज भायरावपाचें प्रमाण उत्तरे परस दक्षीण गोंयांत खुबूच चड आसा. तशेंच दक्षीणे परस उत्तर गोंयांत प्रलंबीत अर्जांचें प्रमाण चड आसा. उत्तर गोंयांत 3,698 जाल्यार दक्षीण गोंयांत 1,885 अर्ज प्रलंबीत आसात. उत्तर गोंयां परस दक्षीण गोंयांत अर्ज निकालांत काडपाचें प्रमाण चड आसा, हें आंकडेवारी वयल्यान स्पश्ट जाता.
राज्याची स्थिती
वट्ट अर्ज 10,184
अर्ज भायरायले 3,092
अर्जांक मान्यताय 1,509
प्रलंबीत अर्ज 5,583
उत्तर गोंयची स्थिती
वट्ट अर्ज 5,079
अर्ज भायरायले 604
अर्जांक मान्यताय 777
प्रलंबीत अर्ज 3,698
दक्षीण गोंयची स्थिती
वट्ट अर्ज 5,105
अर्ज भायरायले 2,488
अर्जांक मान्यताय 732
प्रलंबीत अर्ज 1,885
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
