भांगरभूंय | प्रतिनिधी
कायदो हातांत घेवपाची आगरवाडो चोपडें ग्रामसभेंत पंचायतीक शिटकावणी
भांगरभूंय । प्रतिनिधी
पेडणें : चोपडें दोंगरमाथ्या वयले ब्रह्म अॅग्रो प्रा. लि. कंपनी आनी उदक शिंपणावळ खात्याच्या व्हाळा वयलें डेलींग युनिटाचें पक्कें बांदकाम बेगीन काडचें, पंचायत वाठारांतली कोयर समस्या ताकतिकेन सोडोवपाची मागणी लोकांनी आगरवाडो चोपडें पंचायतीचे ग्रामसभेंत केली. मागणी मान्य जाली ना जाल्यार कायदो हातांत घेवपाची शिटकावणी लोकांनी पंचायतीक दिली.
रस्तो रुंदीकरणाच्या कारणाक लागून उप्रासिल्ले परिस्थितीचेर उपाय काडचे खातीर बेगिनात बेगीन ग्रामसभा घेवप, पुरुमेंत बाजार भरोवप, पंचायत वाठारांतल्या बिराडकारांची नोंदणी करून तांकां कोयर कर लावप, गटार उस्पुपाचें काम ताकतिकेन हातांत घेवप, चोपडें दोंगर माथ्या वयले सरकारी जमनीर वखदीं वनस्पतीची लागवड करप, तातूंतल्या उत्पन्न जावपी महसूल गांवांतल्या दरेका नागरिकाक दिवप, अशे साबार थाराव ह्या वेळार मंजूर केले.
उपसरपंच शिल्पा नायक राऊत हांचे अध्यक्षते खाला जाल्ले हे ग्रामसभेक पंच भगीरथ गांवकार, अँथनी फर्नांडीस, सचीन राऊत, संगिता नायक, सचीव करिश्मा मोरजकार हाजीर राविल्ले. जाल्यार सरपंच हेमंत चोपडेंकार आनी पंच दीबाली लिंगुडकार गैरहाजीर राविल्ले.
सुरवेक सभेची अध्यक्ष शिल्पा नाक राऊत हांणी येवकार दिलो. पंचायतीची सचीव करिश्मा मोरजकार हांणी फाटले सभेचे इतिवृत्त वाचून कायम केलें, 2025-26 वर्साचें अदमास पत्रक मांडलें, तशेंच जमाखर्चाक मान्यताय घेतली.
सचीन बगळी हांणी चोपडें केरी रस्त्याच्या रुंदीकरणा संबंदांत प्रस्न उपस्थीत केलो आनी ताचेर गोंयांतल्या मुंबय उच्च न्यायालयान काडिल्ल्या आदेशा संबंदांत पंचायतीन खाशेली ग्रामसभा कित्याक घेवंक ना, अशें विचारलें. ताचेर पंचायत मंडळान खास वकिलाची नेमणूक करून ते संबंदांत योग्य निर्णय घेवपाचें थारायलां, अशें पंचायती वतीन सांगलें. ताचेर सचीन बगळी हांणी ताका हरकत घेवन दिसाळ्यांत आयिल्ली बातमी वाचून दाखयली. ते प्रमाण भौशीक बांदकाम खातें अश्या बेकायदो आनी रस्त्याचेर अतिक्रमण करून केल्ल्या बांदकामांचेर 25 मे आदीं कारवाय करतलें, अशें सांगताच पंचायत मंडळान ह्या विशयाचेर बेगिनूच ग्रामसभा घेतले, अशें सांगलें.
आगरवाडो चोपडें नागरीक समितीन उपस्थीत केल्ले कोयर समस्येचेर उपाय काडचे खातीर बेगिनूच पावलां उखलतले, तातूंत पयलीं दरेक पंच आपल्या प्रभागांत वचून बिराडाक रावपी तशेंच हॉटेलांचे कुडींचो सर्व्हे करून तांकां कोयर कर लायतले, अशें सांगलें.
चोपड्यां शापोरा न्हंयेदेगेर एका मिठागराचेर बांदिल्ले इमारती कुशीक उदक शिंपणावळ खात्याच्या व्हाळाचेर बांदिल्ल्या बेकायदो बांदकामाक लागून शेतांत उदक सांचून उरतलें, हे खातीर तें बांदकाम तत्काळ काडपाची मागणी अनील शेट्ये हांणी केली. ह्या वेळार जाल्ले चर्चेंत विवेक गांवकार, संजीव गांवकार, तरणी गांवकार, नरेश चोपडेंकार, अनील शेट्ये, ऋशिकेश नायक, सचीन बगळी, शांती चोपडेंकार, सीताराम परब, नंदकुमार नायक, दया परब हांणी वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
