भांगरभूंय | प्रतिनिधी
पेडणें पालिकेचो निर्णयः बसकेंत साबार कामांचेर चर्चा
भांगरभूंय । प्रतिनिधी
पेडणें: पेडणें पालिका वाठारांत जीं बेकायदो निवासी घरां, दुकानां आसात तांकां 2 टक्के कर लावन वसुली करपाचो निर्णय पेडणें पालिका मंडळाचे बसकेंत घेतलो. त्या घरांक हंगामी स्वरुपाचे घरनंबर दिवपाचोय निर्णय घेतलो. गटार वेवस्था जाग्यार घालप, दुकानांचें, घरांचें तशेंच हॉटेलाचें घाणयारें उदक गटारांनी सोडटात ताचेर तशेंच विवीध उदरगतीच्या कामांचेर चर्चा केली.
पेडणें पालिकेची म्हत्वाची बसका नगराध्यक्ष सिद्धेश पेडणेंकार आनी नियुक्त नगरसेवक तशेंच पेडणेंचे आमदार प्रवीण आर्लेकार हांचे हाजिरेंत जाली. ह्या वेळार मुख्याधिकारी अनील राणे, उपनगराध्यक्ष आश्विनी पालयेंकार, नगरसेविका उषा नागवेंकार, विशाखा गडेकार, तृप्ती सावळ देसाय, राखी, नगरसेवक शिवराम तुकोजी, मनोज हरमलकार, माधव सिनाय देसाय, विष्णू उर्फ बाप्पा साळगांवकार तशेंच अभियंते हाजीर आशिल्ले.
पेडणें पालिकेची नवी प्रशासकीय इमारत सुडा वतीन बांदतात. कंत्राटदाराच्या घाळपणाक लागून इमारतीच्या बांदकामाक कळाव जायत आसा. ताका लागून पालिकेक सध्या कदंब म्हामंडळाचें म्हयन्याचें भाडें वाडत आसा. आतां मेरेन 7 लाखां परस अदीक भाडें भरपाचें आसा. कंत्राटदारान इमारत बांदून दिवपाक कळाव केला ताका लागून हें भाडें कंत्राटदारान भरपाक जाय. ताका एके बसकेक आपोवन ताचे कडेन चर्चा करुया अशें आमदार आर्लेकार हांणी सुचोवणी केली. ते उपरांत तसो थाराव मंजूर केलो.
नगराध्यक्ष बदल्ले उपरांत सात दिसां भितर बसका घेवन विवीध समित्यो वेंचपाच्यो आसतात, पूण ह्या वावराक कित्याक वेळ जालो, असो प्रस्न विष्णू साळगांवकार हांणी केलो. ताका जाप दितना नगराध्यक्ष पेडणेंकार हांण सांगलें, फाटले सभेचो इतिवृतांत उसरां मेळ्ळो, ताका लागून विवीध तरांचो बसका घेवपाक कळाव जालो.
पालिकेचीं कांय बँक खातीं पेडणें पालिका वाठारा भायल्या बँकांनी आसात, तीं पालिका वाठारांतले बँकेंत हाडचीं, असो थाराव मंजूर केलो. तेच प्रमाण पेडणें पालिकेचें सोपो कर कंत्राट ताकतिकेन दिवन ताची वसुली करपाचोय थाराव मंजूर केलो.
पालिका वाठारांतले खूबशे हॉटेलकार, कांय घर धनी तांचें घाणयारें उदक गटारांनी सोडटात. ताचो भलायकेचेर परिणाम जावपाक शकता. ताका लागून हो प्रकार बंद करचे खातीर तांचेर कारवाय करची, ह्या मुद्द्याचेर चर्चा जाली.
मॉन्सूनपूर्व कामां बेगिनात बेगीन सोंपोवची, अशी आमदार आर्लेकार हांणी सुचोवणी केली. पालिका वाठारांतल्यो बांयो, व्हाळ, तळी उस्पुपाचेर 30 लाख मेरेन खर्च करपाचेर बसकेंत एकमत जालें. उपनगराध्यक्ष पालयेंकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
