भांगरभूंय | प्रतिनिधी
वॉटरस्पोटर्स धनयांचे बसकेंत पर्यटन मंत्री खंवटे हांची म्हायती
पणजीः वॉटर स्पोटर्स मळार वावुरपी कांय ट्रेव्हल एजन्सी आनी टावट्स जे गोंयच्या पर्यटकांक मालवणा व्हरतात तांकां फुडाराक उपद्रवी म्हूण थारोवन खर कारवाय करतले. तशेंच थळावे वॉटरस्पोर्ट्स आॅपरेटर आसात तांकां पर्यटन खातें उर्बा दितलें. ते भायर थारिल्ले प्रमाण वॉटरस्पोटर्सा खातीर राज्यांत समान दर लागू जाल्यात, अशी म्हायती पर्यटन मंत्री रोहन खंवटे हांणी दिली.
खंवटे हांणी पणजे पर्यटन भवनांत वॉटर स्पोर्ट्स धनी आनी दर्यादेगेवेल्या आमदारांची बसका घेतली. हे बसकेंत कळंगुटेचे आमदार मायकल लोबो, शिवोलेची आमदार डिलायला लोबो, साळगांवचे आमदार केदार नायक, मुरगांवचे आमदार संकल्प आमोणकार, पर्यटन संचालक केदार नायक आनी वॉटरस्पोर्ट्स संघटणेचे धनी हाजीर आशिल्ले. हे बसके उपरांत म्हायती दितना खंवटे उलयताले.
थारिल्ले प्रमाण दरांत समानताय राजपत्रांत अधिसुचोवणी हाडून अंमलात हाडल्या. दोन वर्सां जालीं हो विशय आडकून आशिल्लो. वॉटरस्पोर्ट्स धनयांनीच हें समान दर थारावचें अशें पर्यटन खात्यान सांगिल्लें. ते प्रमाण तांणीच हें दर थारयलां आनी ह्या दराचे तकटे तयार करप चालू आसा. काय एजन्सी ऑनलायन आनी कचेरींनी कसलीच परवानगी नासतना वॉटर स्पोटर्साच्यो तिकेटी विकतात. पर्यटन खातें थळावी पंचायत आनी संघटणेचे मजतीन पर्यटकांक कसलेच त्रास करिनासतना हे एजन्सीचेर कारवाय करपाक सुरू करतले, अशी शिटकावणी पर्यटन मंत्र्यान दिल्या.
गोंयचे पर्यटक व्हरतात मालवणां
महाराष्ट्रांतल्यो कांय एजन्सी आनी टावट्स गोंयांत तिकेटी विकून हांगा आयिल्ल्या पर्यटकांक मालवणां आनी हेर राज्यांनी व्हरतात. आमी हे विशीं विधानसभेंत कायदो मंजूर केल्लो. ह्या कायद्याच्या भारतीय दंड संहीता कलमा सकयल तांकां उप्रद्रवी थारोवन तांचेर कारवाय करतले आनी उपरांतच हो वेवसाय गोंयकारांचोच आनी संघटणेच्या काउंटराचेरूच तिकेटी मेळटल्यो असो स्पश्ट संदेश वयतल्यो. जे गोंयचे एजन्सी ऑनलायन लिंक आसात तांकां पर्यटन खातें उर्बा दितले, अशें उतर खंवटे हांणी दिलें.
ते भायर वॉटरस्पोर्ट्स कावंटराचे कलर कोडींग करून ते पर्यटकांक आकर्शीत करपाची सुचोवणी दिल्या. उत्तर आनी दक्षीण गोंयची दर्यादेग आसुनय पर्यटकांक हो वॉटर स्पोटर्स कावंटर म्हूण कळपाक जाय. ह्या कावंटराचो एक सॅम्पल आमकां दाखयला. आमी हे विशीं अदीक सुचोवणी दिवन ताचेर बेगीनूच अंमलबजावणी सुरू करतले. जर पर्यटकांक कितें समस्या येता आसत जाल्यार 1364 हे हॅल्पलायनीचेर संपर्क करपाक सांगलां, अशी म्हायती खंवटे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
