भांगरभूंय | प्रतिनिधी
परवानगी घेनासतना भुरग्यांचे बागेंत उबारिल्लो ट्रान्सफोर्मर थंयच दवरपाचो निर्णय
भांगरभूंय । प्रतिनिधी
मुरगांवः वास्कोच्या मुरगांव पालिकेचे भुरग्यांचे बागेंत वीज विभागान बेकायदो तरेन संबंदीत विभागाची परवानगी घेनासतना उबारिल्लो ट्रान्सफोर्मर आनी भुंयगत वीज जोडणी बॉक्साचेर मुरगांव पालिका बसकेंत आसा थंयच कायम स्वरुपी दवरपाचो निर्णय घेतलो.
हो ट्रान्सफोर्मर भुरग्यांचे बागेंत लोकांच्या हिता खातीर उबारला, अशें मुरगांवचे नगराध्यक्ष गिरीश बोरकार हांणी सांगलें. भुरग्यांचे बागेंत वीज विभागा वतीन ट्रान्सफोर्मरच्या सरवय सुरक्षेची सगळी जतनाय घेतले, अशी म्हायती नगराध्यक्ष तशेंच वास्को वीज विभागाचे कार्यकारी अभियंते प्रदीप एम. नायक, सहाय्यक अभियंते विशाल पवार हांणी दिली.
मुरगांव पालिकेची सोमारा 15 जानेवारीक रवीन्द्र भवनांतल्या बोर्ड रुमांत बसका जाली. हे बसकेंत विवीध समाज उपेगी प्रकल्पां खातीर मंजुरी दिली. हे बसकेत नगराध्यक्ष गिरीश बोरकार, मुख्याधिकारी जयंत तारी, नगरसेवक आनी पालिका अधिकारी वर्ग हाजीर आशिल्लो.
वास्को बायणा पॉवर हावस वेवसायीक प्रकल्प पुराय करचे खातीर, बायणा पॉवर हावसा मुखार रस्तो प्रकल्प उबारतना कांय दीस बंद दवरपाचो निर्णय बसकेंत घेतलो. मुरगांव सड्यार सरकारी मुळावें भलायकी केंद्र उबारचे खातीर सगळ्यांनी मंजुरी दिली. तें मुळावें भलायकी केंद्र 20 खाटींचें आसतलें, अशी म्हायती नगराध्यक्ष बोरकार हांणी दिली. सड्यार बांदपा आशिल्ल्या मुळाव्या भलायकी केंद्राची जमीन महसूल विभागा खाला येता. ताका रोखडीच कायदेशीर मंजुरी घेतले, अशेंय नगराध्यक्षान सांगलें.
वीज विभागान परवानगी घेनासतना वास्को स्वतंत्र पथ मार्गा वयले पालिकेचे भुरग्यांचे बागेंत बेकायदो तरेन उबारिल्लो भुंयगत वीज ट्रान्सफोर्मर आनी वीज वोडणी बॉक्सा खातीर बसकेंत सगळ्यांनी मंजुरी दिली. तो ट्रान्सफोर्मर भुरग्यांचे बागेंतूच दवरलो जाल्यार ताचो फायदो शारांतल्या लोकांक जातलो, अशें नगराध्यक्ष बोरकार आनी नगरसेविका शमी साळकार हांणी सांगलें. ह्या वेळार नगरसेवक दामू नायक हांणी वीज ट्रान्सफोर्मराचे सरवय सुरक्षे संबंदांत उपाय येवजण आंखची अशी मागणी केली. वीज विभाग ट्रान्सफॉर्मरा मुखार सुरक्षा कवच उबारतलें, अशी म्हायती नगराध्यक्षान दिली.
मुरगांव पालिकेचे भुरग्यांचे बागेंत बेकायदो तरेन वीज विभागान भुंयगत वीज सरयां खातीर ट्रान्सफोर्मर आनी वीज जोडणी बॉक्स उबारून व्हड गुन्यांव केला, अश्या आशयाचो खबरो दिसाळ्यांनी येताच वीज विभागान मुरगांव पालिकेंत परवानगे खातीर अर्ज दाखल केल्ल्याचें, वीज विभागाचे कार्यकारी अभियंते प्रदीप एम. नायक आनी सहाय्यक अभियंते विशाल पवार हांणी सांगलें.
ट्रान्सफॉर्मर उबारपाक आमकां सुवात नाशिल्ल्यान आमी भुंयगत वीज जोडणेचो ट्रान्सफोर्मर पालिकेचे भुरग्यांचे बागेंत उबारिल्ल्याची म्हायती अभियंता नायक हांणी दिली.
फुडारांत भुरग्यांचे बागेंत वीज ट्रान्सफोर्मराचो शॉक लागून एकादी दुर्घटणा घडली जाल्यार ताका जापसालदार कोण आसतलो, हाची म्हायती मात संबंदीत विभागान दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
