बेकायदो जमीन पुरोवपी ट्रकाक पालिकेच्या कर्मचाऱ्यांनी दिलो सोडून

भांगरभूंय | प्रतिनिधी

गांवसवाडो, म्हापशें हांगासरली घडणूक

म्हापशें: गांवसवाड्यार रस्त्याचे कुशीक मातयेचो भराव घालून बेकायदो रितीन जमीन पुरोवपी ट्रकाक पालिका कर्मचाऱ्यांनी रंगेहात धरलो. पूण कारवाय करिनासतनाच ट्रकाक सोडून दिलो.

फाटल्या कांय वर्सां सावन गांवसवाडो ते कामरखाजन मजगतचो भितरलो रस्तो तशेंच राष्ट्रीय म्हामार्गाचे कुशीची शेत जमीन पुरोवन बांदकामां उबारतात.

सोमारा सांजवेळा 4.30 वरांच्या सुमाराक अशेच तरेन ट्रक आनी जेसीबीच्या आदारान मातयेचो भराव घालून रस्त्या कुशीचे शेत जमनीचें सपाटीकरण सुरू आशिल्लें. हो बेकायदो प्रकार थळाव्या लोकांनी पालिका अधिकाऱ्यांचे नदरेक हाडून दिलो. ते प्रमाण पालिकेच्या अभियंतो विभागा वतीन घडणूक थळार पालिका निरिक्षकांच्या फुडारपणा खाला पंगड धाडलो. सांजवेळा 5.30 वरांच्या सुमाराक एक ट्रक घडणूक थळार मातयेचो भराव घालतालो. तेन्ना थंय तैनात आशिल्ल्या पालिकेच्या पंगडान त्या ट्रकाक मातयेचो भराव शेतांत रितो करचे पयलींच धरलो. ट्रक चालकाची चवकशी केले उपरांत ह्या पंगडान मातयेन भरिल्ल्या ट्रका सयत चालकाक कसलीच कारवाय करिनासतना सोडून दिलो.

पालिकेच्या ह्या प्रकारा खातीर गावसवाड्या वेल्या लोकांनी तिडक उक्तायली. पुलीस आनी मामलेदारा वतीन ह्या बेकायदो प्रकाराचेर खर कारवाय जावंक जाय आशिल्ली. बेकायदो जमीन पुरोवपी तेवूय मॉन्सुनाच्या तोंडार भूंय माफियां कडेन म्हापशें पालिकेच्या अधिकाऱ्यांयांचें आनी कर्मचाऱ्यांचें साटेलोटे आशिल्ल्याचो आरोप थळाव्यांनी केला.

मजगतीं, फेब्रुवारी 2023 वर्सा महसूल खात्यान एक परिपत्रक जारी करून राष्ट्रीय म्हामार्ग, राज्य म्हामार्ग आनी रस्तो रुंदीकरण क्षेत्रांत बेकायदो मातयेचो भराव घालप वा बांदकाम सुरू आसल्यार ताचेर कारवाय करपाचे निर्देश उपजिल्होधिकारी, मामलेदार आनी घोळट्या पंगडाक दिल्ले. ह्या आदेशांत पालिका वा पंचायत क्षेत्रांतले भितरले रस्ते वा शेत जमीन पुरोवपाच्या प्रकारांचेर कारवायेची कसलीच जापसालदारकी वयल्या अधिकाऱ्यांक दिल्ली ना. तरी लेगीत ह्या परिपत्रकाचो आदार घेवन म्हापशें पालिकेन गांवसवाड्यार जमीन पुरोवप्यांक मेकळे सोडून दिवपाचो प्रताप केलो.

गांवसवाड्यार मातयेचो भराव घालून शेत जमीन पुरोवपाचो प्रकार सुरूच आसा. कालूय असोच प्रकार सुरू आशिल्लो. पालिका निरिक्षकांनी घडणूक थळार एका ट्रकाक रंगेहात धरलो. सदर ट्रक जप्त करपाचे निर्देश नाशिल्ल्याचें सांगून ताका कारवाय करचे पयलींच सोडून दिलो. हो एकंदरीत कायद्याचें उल्लंघन करपी प्रकार आसून पालिकेचो अभियंतो विभाग हाका कारणीभूत आसा अशें थळावे नगरसेवक प्रकाश भिवशेट हांणी सांगलें.