बेकायदो आसा हें खबर आसून लेगीत ‘बर्चा’क परवानो

भांगरभूंय | प्रतिनिधी

कोठडे खातीर हणजूण पुलिशेचें न्यायालयांत प्रतिज्ञापत्र

भांगरभूंय । प्रतिनिधी

पणजी : ‘बर्च बाय रोमियो लेन’ हो नायट क्लब शेत जमीन आनी मिठागरांत बेकायदो तरेन उबारला, हें खबर आसून लेगीत हडफडें नागवाचे तेन्नाचे सरपंच रोशन रेडकार आनी तेन्नाचे पंचायत सचीव रघुवीर बागकार हांणी दुसऱ्याच्या घर नंबराचेर बनावट दस्तावेज तयार करून नियमीत वेवसाय परवानो जारी केलो. तशेंच 20 म्हयने क्लब चालू दवरपाक मजत केली. ते भायर मातये भरवण करपाची नोटीस जारी करून ताचेर सगलीच कारवाय करूंक ना, अशे खूबशे मुद्दे उपस्थीत करून हणजूण पुलिसांनी त्या दोगांची कोठडी गरजेची आशिल्ल्याचो दावो करपी प्रतिज्ञापत्र गोंयांतल्या मुंबय उच्च न्यायालयांत सादर केलां.

6 डिसेंबर 2025 ह्या दिसा बर्च क्लबांत जाल्ले उज्याचे दुर्घटणेंत 25 निश्पाप लोकांक जीव वगडावचो पडिल्लो, जाल्यार 6 जाण जखमी जाल्ले. ह्या प्रकरणांत हणजूण पुलिसांनी नोंद केल्ल्या गुन्यांवांत आपली अटक टाळचे खातीर रोशन रेडकार तशेंच रघुवीर बागकार हांणी उत्तर गोंय जिल्हो आनी सत्र न्यायालयांत अटकपूर्व जामीन अर्ज दाखल केल्लो. मजगतीं, म्हापशेंच्या अतिरिक्त जिल्हो सत्र न्यायालयान दोगांचेय अटकपूर्व जामीन अर्ज भायर मारले. ह्या आदेशाक दोगांनीय गोंयांतल्या मुंबय उच्च न्यायालयांत आव्हान दिलें. हे संबंदांत बुधवारा 7 जानेवारीक न्यायालयांत सुनावणी जाली. त्या वेळार दोगांकूय अंतरीम थाकाय दिवपाक न्हयकार दिलो. तशेंच ह्या प्रकरणाची फुडली सुनावणी शुक्रारा 9 जानेवारीक दवरिल्ली. शुक्रारा न्यायालयांत सुनावणी जाली तेन्ना तेन्नाचे पंचायत सचीव रघुवीर बागकार हाचे वतीन वकिलान बाजू मांडपा खातीर वेळ मागलो. ते प्रमाण फुडली सुनावणी 12 जानेवारीक दवरल्या.

मजगतीं, हणजूण पुलिसांनी दोगांच्या अटकपूर्व जामिना वयल्या आदेशाच्या आव्हानाचेर न्यायालयांत बाजू मांडली. तातूंत बर्च बाय रोमियो लेन ह्या नायट क्लबाचो वेवसायीक परवानो संबंदांत तेन्नाचे सरपंच रेडकार आनी तेन्नाचे सचीव बागकार हांच्या गैरकृत्याची म्हायती न्यायालयांत सादर करून त्या दोगांनीय कशे तरेन क्लब सुरू दवरपाक मजत केल्ल्याचो दावो केलो. तशेंच त्या दोगांची कोठडी गरजेची आशिल्ल्याचे मुद्दे उपस्थीत केले.

बर्च बाय रोमियो लेन क्लबाक वेवसायीक परवानो मेळोवन दिवचे खातीर 11 डिसेंबर 2023 ह्या दिसा अर्ज सादर केल्लो. वयल्या दोगांनी वा अर्जदारांची चवकशी करिनासतना 14 डिसेंबर 2023 ह्या दिसा जाल्ले पंद्रशेचे बसकेंत इतिवृत्त नासतना अर्जाचेर चर्चा केली. ते प्रमाण 16 डिसेंबर 2023 ह्या दिसा वेवसायीक परवानो जारी केलो. ते खातीर अर्जाचर खोडाखोड करून दुसरो सर्व्हे नंबरांतलो घर नंबर वयल्या अर्जांत नमूद केलो. ह्या संबंदांत पुलिसांनी संबंदीत वकिलांची चवकशी केली, तेन्ना ताणें मूळ अर्जाची प्रत सादर केली. ते प्रमाण, पंचायत कार्यालयांत सादर केल्ल्या अर्जाचेर खोडाखोड केल्ल्याचें स्पश्ट जालें.

मजगतीं, वेवसायीक परवानो दिले उपरांत 18 डिसेंबर 2023 ह्या दिसा संबंदीत बेकायदो बांदकामां संबंदांत कागाळ पंचायतींत दाखल केल्ली. ते प्रमाण, पंचायतीन 29 डिसेंबर 2023 ह्या दिसा नोटीस जारी करून संबंदीत बांदकामाची 4 जानेवारी 2024 ह्या दिसा पळोवणी दवरिल्ली. पळोवणी उपरांत 17 जानेवारी 2024 ह्या दिसा केली. त्या वेळार तेन्नाचो सरपंच गैरहाजीर रावलो.

हे पळोवणेंत संबंदीत बांदकाम बेकायदो आशिल्ल्याचें मुखार आयले उपरांत 15 फेब्रुवारी 2024 ह्या दिसा पंचायतीन कारणां दाखय नोटीस जारी केली. 20 एप्रील 2024 ह्या दिसा 15 दिसां भितर बांदकाम मातये भरवण करपाचो आदेश पंचायतीन दिलो. ह्या आदेशाक कथीत जमीन धनी सुरेंद्र कुमार खोसला हाणें 3 जून 2024 ह्या दिसा अतिरिक्त पंचायत संचालनालया कडेन आव्हान दिलें. हे मजगतीं, खोसला हाचे वतीन कोणूच सुनावणेक हाजीर रावूंक नासतना अतिरिक्त पंचायत संचालनालयान वयल्या मातये भरवण आदेशाक स्थगिती दिली.

मजगतीं, 3 जून ते 4 डिसेंबर 2024 ह्या काळांत सुनावणेक पंचायत सचीव वा सरपंच ताचे हेर प्रतिनिधी जाणीवपूर्वक उपस्थीत रावूंक नात. जाल्यार 4 डिसेंबर 2024 ह्या दिसा पंचायती वतीन वकील उपस्थीत आशिल्लो, अशी म्हायती पुलिसांच्या तपासांत मुखार आयलें.

मजगतीं, अबकारी खात्यान परवानो जारी करचे कातीर पत्रवेव्हार करून म्हायती मागयली, तेन्ना वयल्या दोगांनी प्रतिसाद दिवंक ना वा आडावपा खातीर कांयच करूंक ना. ते भायर तेन्नाच्या सरपंचाक पुलीस चवकशेक आपयले तेन्ना सुमार 100 परस अदीक थळाव्या लोकांक पुलीस स्टेशनाचेर हाडून चेपण घातलें, तेचवरी कायदो आनी सुवेवस्था इबाडावपाचो यत्न केलो. तेचवरी तेन्नाच्या सरपंचान आनी सचिवान परवान्याची मुजत सोंपले उपरांत लेगीत बर्च बाय रोमियो लेनचो कारभार थांबोवचे कातीर कसलोच यत्न करूंक ना. पर्यावरणीय आनी सुरक्षेचे नेम मोडून लेगीत हेर यंत्रणांनी परवाने जारी केले. ताका लागून सांखळेंतल्या हेरांचो तपास करचे खातीर त्या दोगांची कोठडी गरजेची आसा, असो दावो पुलिसांनी न्यायालयांत केलो.

बिजय कुमार सिंगाक अटक

बर्च दुर्घटणा प्रकरणांत क्लबाच्या ऑपरेशनाक बिजय कुमार सिंग (रा. झारखंड) हाका हणजूण पुलिसां कडल्यान अटक केल्या. घडणुके उपरांत दुबावीत गोंयांतल्यान आपल्या गांवांत पळून गेल्लो.