भांगरभूंय | प्रतिनिधी
शॅक वेवसाय हो बेरोजगार तरणाट्यांक स्वताच्या पांयाचेर उबो करपाक बरो. पूण, थंय तांकां नखलामी करपी बेकायदेशीर धंदे सुरू जाले, जाल्यार…
शॅक ही आतां गोंयच्या पर्यटनाची वळख जाल्या. खरें म्हणल्यार ह्यो तात्पुरत्यो खोंपी. जातूंत रॅस्टाेरंण्ट, बार आसता, पर्यटकांक वत खावपाक भायर खाटीं घालतात आनी कितें नाका जाय तें पळोवपाक वेटर आसतात. गोंयांतले कांय शॅक आतां पर्यटन मोसम सोंपलो काय मोडून उडयनात. शॅक म्हणल्यार दर्यादेगेर वा दोंगरार उबारिल्ली खोंप. थंय वचून इश्ट कांय दीस रावतात. शेतांतल्या पिकाची राखण करपाक मचाण बांदतात तसोच कांयसो हो प्रकार. शॅकांक आनिकूय अर्थ आसात. पूण गोंयांत खोंपींतली खाणावळ अशें तिका म्हणूं येता. जी दीस- रात चालू आसता आनी थंय नशा हाडपी द्रव्यांय मेळटात. हे शॅक ना जाल्यार दर्यावेळ पर्यटनाक खर धपको बसतलो, हें वेगळें सांगपाक नाका. हालींच केरी- पेडणेंच्या कांय शॅकधनयांनी दर्यावेळेर बेकायदेशीर शॅक आसात, ताका लागून आमकां गिरायक जायना, अशें म्हणलां. ते बंद करचे, अशीय तांची मागणी.
दर्यादेग वाठारांत थळाव्या बेरोजगार तरणाट्यांक रोजगार मेळचो म्हूण पर्यटन खात्यान शॅक परवाने दिल्ले. तांचे खातीर जागोय थारायिल्लो. मात तांचे कुशिकूच थोड्यांनी शॅक वेवसाय आनी लांकडाच्यो खाटीं घालून अतिक्रमणाचो यत्न केलो. देखून एकलो शॅक धनी न्यायालयांत गेल्लो. उपरांत, थळाव्यांक जे जागे निश्चीत केल्यात, थंय कोणाकूच कसलेच तरेचें अतिक्रमण करपाक दिवचें न्हय, तें करप्यांचेर कडक कारवाय करची, असो आदेश न्यायालयान दिलो. पूण, सरकारी यंत्रणेन हाचे कडेन लक्ष दिवंक ना जातलें. कारण थळाव्या तरणाट्यांक दिल्ल्या जाग्यां कुशिकूच बेकायदेशीर पद्दतीन अतिक्रमणां करून भलतेच कोण तरी शॅक वेवसाय करतात, अशी कागाळ कोर्टांत गेल्ल्या त्या शॅक धनयान केल्या. बेकायदेशीर वेवसाय करपी धाडसी आसतात, असो एक चुकीचो समज. कोणाक तरी सूर- रोंट घालून ते हो वेवसाय करतात. विरोधक दुबळो आसल्यार तांकां सगलें पचता. तो आवाज काडपाक लागलो, जाल्यार तो चेपपाकूय हे बेकायदेशीर गडे फाटीं फुडें पळयनात. केरी- सत्तरींत नेमकें कितें जालां, ताची चवकशी दर्यावेळ पुलीस, पंचायत आनी पर्यटन खात्यान करुंक जाय. एकल्याच शॅक धनयाचे बाबतींत हें जालां, काय केरी सारकीच हेर कडेनूय परिस्थिती आसा, ताचोय तपास करचो पडटलो. हेर दर्यावेळांचेरूय असलेच प्रकार जाल्यात जाल्यार ताचोय सोद घेवचो पडटलो. पुलिसांनी आपले गुप्तचर संघटणे वरवीं बेकायदेशीर शॅकांक कोणाचो आशिर्वाद आसा, तें सोदून काडल्यार हो गुंथो बेगीन सुट्टलो.
शॅक घालतलो वा दर्यावेळेचेर हेर कसलोय वेवसाय करतलो जाल्यार लाखांनी रुपया कर सरकाराक भरचो पडटा.
मात बेकायदेशीर शॅकांक परवानो फी, टॅक्स बी कांय लागना. हे शॅक घालपी कोण? तांकां ते घालपाक परवानगी दिवपी कोण? थळावे फुडारी काय अधिकारी? शॅक घालपाक सरकारी प्रक्रिया पुराय करची पडटा काय कोणेय वचून मेळटा थंय तो घालूं येता? बेकायदेशीर वेवसाय करपी जर अर्थीक, शारिरीक नदरेन बळिश्ट आसलो जाल्यार ताचे वाटेक कोण वचनात. तातूंत तो फुडाऱ्यांचो आवडटो आसल्यार मागीर विचारुंकच नाकात. चिखलांत गुंडो उडोवन स्वताक म्हेळो करून घेवपाची सगल्यांचीच प्रवृत्ती नासता. नेमकें हांगांच बेकायदेशीर वेवसाय करप्यांचें फावता. पर्यटन खात्यान थळाव्यांक शॅकां खातीर जागे दिल्ले तातूंत कितले शॅक चलतात, तांचे कुशीक बेकायदेशीर शॅक चलतात काय नात, तें सोदचें पडटलें. कायद्याक धरून ना जाल्यार तांचेर कारवाय करची पडटली. शॅक वेवसायांत कांय सुटना (फायदो जायना) अशें सगलेच म्हणटात. तशें आशिल्लें जाल्यार बेकायदेशीर शॅक उबे जावचे नासले. शॅक वेवसाय हो बेरोजगार तरणाट्यांक स्वताच्या पांयाचेर उबो करपाचो बरो मार्ग. पूण थंय तांकां नखलामी करपी बेकायदेशीर धंदे सुरू जाले, जाल्यार शॅक धनयांच्या बोल्सांत कांय पडचें ना.
फाटीं दर्यावेळांचेर चलपी बेकायदेशीर उदका खेळां संदर्भांत बोवाळ जाल्लो. कारण बोट उमथून एकल्याक मरण आयिल्लें. त्या बोट धनयाचो परवानो रद्द केल्लो. ताचे पयलींय 1 – 2 दुर्घटना घडिल्ल्यो. तातूंतल्या दोशींचेर कितें कारवाय जाली? ह्या खेळांचेर नियंत्रण आयलें? परवाने घेनासतना, कर फारीक करिनासतना पर्यटनाच्या मळाचेर जायते वेवसाय चलतात, अशें गोंयकारूच सांगतात. सरकार हें अशें आपलें लुकसाण कित्याक करून घेता तें कळना? हे पयशे तिजोरे बदला आनीक खंय वतात काय? सरकारान दर्यावेळां वयल्या बेकायदेशीर शॅक अतिक्रमणां आड बेगीन निर्णय घेवचो. नाजाल्यार पर्यटक आनी शॅक धनया भशेन फाल्यां कायदेशीर शॅक धनी आड बेकायदेशीर शॅक धनी अशीं केस्तांवां जावंक आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
