भांगरभूंय | प्रतिनिधी
मडगांव: सुरावले बेकायदेशीर रितीन गॅस सिलिंडर भरपी रॅकेट उक्तडार आयलां. ह्या प्रकरणांत कोलवा पुलिसांनी पांच दुबावितांक अटक केल्या. तशेंच 80 घरगुती गॅस सिलिंडर जप्त केल्यात.
सुरावलेंतल्या भंगार अड्ड्याचेर घरगुती गॅस सिलिंडरांत गॅस भरपाचो प्रकार चालू आशिल्ल्याची म्हायती कोलवा पुलिसांक मेळिल्ली. ते प्रमाण सोमारा सकाळीं सुमार पांच वरांचेर कोलवा पुलिसांनी भंगार अड्ड्याचेर धाड घाली. ह्या वेळार घरगुती गॅस सिलिंडरांतल्यान उरिल्ली गॅस काडून दुसऱ्या सिलिंडरांत भरपाचें काम सुरू जाल्ल्याचें उक्तें जालें. अशे तरेन अर्दे भरिल्ले सिलिंडरूय विकताले. कसलोच परवानो नासतना आनी सुरक्षेचे कसलेच नेम पाळनासतना उक्त्या सुवातेर गॅस सिलिंडर भरताले, जाका लागून भौशीक सुरक्षेक धोको निर्माण जालो.
कोलवा पुलिसांनी 80 गॅस सिलिंडर जप्त केल्यात. हाचे भायर गॅस भरपा खातीर वापरिल्लें सामानूय जप्त केलां. कोलवा पुलिसांनी ह्या प्रकरणांत पांच जाणांक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
