भांगरभूंय | प्रतिनिधी
भांगरभूंय । प्रतिनिधी
पोरणे गोंयः मोराम्बी ओ ग्रांद ह्या महसुली वाठारांत बेकायदेशीर बांदकाम केल्ले खातीर चिंबर पंचायत मंडळान आपल्याच पंच वांगड्याक कारणां दाखय नोटीस दिवपाचो प्रकार घडला. बांदकाम कित्याक मोडून उडोवचें न्हय हाची जाप 15 दिसांत दिवपाकर पंच वांगड्याक सांगलां. दिल्ले मुजतींत जाप दिली ना जाल्यार पंचांयत मंडळ हें बांदकाम मोडून उडयतलें.
रिव्होल्युशनरी गोवन्साचो फुडारी अजय खोलकार हांणे ह्या बांदकामा विशीं पंचायत मंडळा कडेन कागाळ केल्ली. फाटल्या म्हयन्यांत ह्या बांदकामाची पंचायत मंडळान तपासणी केल्ली आनी आतां कारणा दाखय नोटीस दिल्या अशी म्हायती तांणे दिली. मालमत्तेच्या 1 आनी 16 फॉर्मांत संबंदीत पंच वांगड्याचें नांव ना. पंचायत मंडळ आनी सरकारी यंत्रणेक किंकोंत करून स्थलांतरीत बांदकाम करतात हाची हें बांदकाम म्हणल्यार एक देख आसा अशें अजय खोलकार हांणे सांगलें. मोराम्बी ओ ग्रांद हांका एक मजल्याचें हें बेकायदेशीर बांदकाम आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
