भांगरभूंय | प्रतिनिधी
प्रत्येकान पोट भरपाचो अधिकार संविधानान दिला. मात, कायदेशीर मार्ग आपणावन हात- पांय हालोवपाक जाय. सगलेच अशें करताच अशें ना. कांयजाण कायदो माड्डून, सरकारी यंत्रणेचे हात ओले करून आपल्याक जाय तें करतात आनी मागीर त्रासांत पडटात. गोंयचे पुराय दर्यादेगेर एकूय बेकायदेशीर बांदकाम दवरूं नाकात, असो आदेश गोंयच्या मुंबय उच्च न्यायालयान मंगळारा दिला. हाचे मुखार एकूय बेकायदो बांदकाम उबें जावचें ना, हाचेर बारीकसाणेन नदर दवरपाचो आदेशूय पर्यटन संचालकांक दिला. पर्यटन खात्याक हीं बादकामां आतां मोडचीं पडटलीं. सध्या लोकसभेचें वातावरण आशिल्ल्यान ही कारवाय मुखार वचूं शकता वा बांदकाम करपी संबंदीत वेवसायीक वयल्या न्यायालयांत वचून स्टे हाडपाक शकतात. पेडणें तालुक्यांत कसलीच परवानगी घेनासतना उबारिल्लें एक हाॅटेल मोडपाचो आदेश न्यायालयान दिल्लो, मागीर ताचेर कांय जालें ना शें दिसता. मात, कळंगूट दर्यादेगेचेर फाटीं बेकायदेशीर बांदकामांचेर कारवाय जाल्ली. सादारण 16 बांदकामां पर्यटन खात्यान मोडून उडयिल्लीं. पूण, अजून थंय आनीक कांय बेकायदो बांदकामां उरल्यांत, अशें दिशिल्ल्यान न्यायालयान तीं बेगोबेग उडोवपाक सांगल्यांत. म्हणल्यार फाटीं सगलींच उडोवंक नाशिल्लीं काय आतां नव्यान बी उबारल्यांत?
कळंगुटचीं चडशीं बेकायदो बांदकामां पर्यटन खात्याचे जमनीचेर आसात. तशीं सगल्यांकूच ती आसात. कांय कडेन सरकारी, तर उरिल्ले कडेन कोमुनिदादीचे जमनीर. हांगा एकलो जागृत नागरीक न्यायालयांत गेल्ल्यान हो प्रकार उक्ताडार आयलो आनी न्यायालयान कडक पावलां उबारलीं. ह्या बांदकामांक लायट, उदकाचें कनेक्शन दिवं नाकात. तीं दितकच तांकां उर्बा मेळटा. मागीर दुसरे लोकूय बेकायदो बांदकाम करपाक मुखार येतात. अधिकारी कारवाय करीनात म्हूण अशा बांदकामांचो आंकडो वाडपाक लागला, अशेंय न्यायालयान म्हणलां. हाचेर सरकारी यंत्रणा आनी समाजानूय, खास करून बेकायदो बांदकामां उबारप्यांनी विचार करपाक जाय. अमूक अमूक आपले वळखीचो, म्हणटकच आपणें कितेंय केल्यार पचतलें, ही मानसिकताय समाजांत वाडत आसा. तिका सातत्यान सारें- उदक मेळत रावलें जाल्यार ताचो आमच्या म्हान देशाचेर परिणाम जातलो, हें आमी विसरूंक फावना. खास करून समाजांत असल्यो घडणुको घडटात, तेन्ना राष्ट्रप्रेमी नागरिकांनी मुखार येवन ताचे आड विवीध मार्गान आवाज काडपाक जाय. फक्त सोशल मिडियाचेर व्यक्त जावन कांय साध्य जावचें ना. पोस्ट, व्हिडियो घालून फक्त गैरप्रकार उक्ताडार येतात. लोकूय सरकारी यंत्रणांक खेपतात. पूण फाटपुरवण जायना जाल्यार ते समस्ये कडेन कोण लक्ष दिनात. कांय दिसांनी मागीर सगलें शांत- शांत जाता.
बेकायदो बांदकामांक उदक, लायट कनेक्शन दिवपी व्यक्तींचेरुय कारवाय जावंक फावो. दर्यादेगांचेर अतिक्रमण जालां, ताचेरुय न्यायालयान बडी मारल्या. अतिक्रमणाक लागून दर्यादेगेचें, पर्यावरणाचें लुकसाण जाल्लें आसल्यार संबंदितां कडल्यान भरपाय घेयात, अशें न्यायालयान सांगलां. बेकायदेशीर बांदकाम करतना संबंदीत लाखांनी रुपया खर्च करता. पूण ताका भंय कसो दिसना, हुस्को कसो जायना. कारण न्यायालयाचो आदेश आयलो आनी बांदकाम मोडलें जाल्यार ताचें अर्थीक लुकसाण जावं येता. घाम गळोवन कश्ट करपीय हें धाडस करतात, तेन्ना अजाप जाले बगर रावना. पेडणें तालुक्यांत कितलींशीच बांदकामां, वेवसाय कसलेच परवाने घेनासतना सुरू केल्यांत. हातूंत ल्हान आनी व्हड वेवसायिकूय आसात. सरकार एक दीस तीं बांदकामां कायदेशीर करतलो अशी जबरदस्त आशा बी तांकां आसता काय? सरकारान सीआरझेड वाठारांतलीं आनी हेर कडलीं तशीं जायतीं कामां कायदेशीर केल्यांतूय बी. दर्यादेग वाठारांतलीं तात्पुरतीं बांदकामां आनी 1991 वर्सा पयलींचीं घरां वाटावपाक सरकारान पर्यटन खात्या वतीन वटहुकूम काडला. जांचे कडेन 1991 पयलींचें लायट, उदक कनेक्शन, घरपट्टी, वेवसाय परवानो आसा तांचीं बादकामां मोडचे नात, अशें मुख्यमंत्र्यान हालींच म्हणलां.
सरकारी यंत्रणांनी आतां उच्च न्यायालयाचो हो नवो आदेश योग्य पद्दतीन चालीक लागतलो आनी दर्यादेगो, दर्यावेळांचेर हाचे मुखार एकूय बेकायदो बांदकाम, घर उबें जावचें ना, हें पळोवचें पडटलें. ह्या चक्राक खंयतरी ब्रेक लागपाकूच जाय. नाजाल्यार कायदेशीर वेव्हार करप्यांचेर तो अन्याय थारतलो. आपलो वेवसाय वाडोवपाचो, नवें बांदकाम करपाचो हक्क सगल्यांक आसा. पूण कितें तें कायदेशीर मार्गान जावंदी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
