भांगरभूंय | प्रतिनिधी
न्यायालया कडल्यान स्वेच्छा याचिका दाखल; 22 ऑक्टोबराक सुनावणी
भांगरभूंय । प्रतिनिधी
पणजीः बेकायदा बांदकामा आड कारवाय करपाक कांय पंचायतींनी घाळपणां केल्ल्यान बेकायदा बांदकामां आतां उच्च न्यायालयाच्या रडाराचेर आयल्यात. बेकायदा बांदकामां आड कारवाय करपा खातीर कांय पंचायतींच्या घाळपणांक लागून आतां गोंयांतल्या सगळ्याच पंचायतींचेर ताचो परिणाम जातलो. बेकायदा बांदकामांची गंभीर दखल घेवन उच्च न्यायालयान स्वेच्छा याचिका दाखल केल्या. सरकार आनी पंचायत संचालनालयाक प्रतिवादी केल्यात आनी 22 ऑक्टोबराक सुनावणी जातली. पालिका वाठारांतल्या बेकायदा बांदकामांची लेगीत जनहीत याचिके वेळार उच्च न्यायालय दखल घेतलें. सीआरझॅड आनी एनडीझॅड वाठारांतल्या बांदकामांची लेगीत तपासणी जातली.
न्यायालयाक मजत करपा खातीर अॅड. विठ्ठल नायक हांची अॅमिकस क्युरी म्हूण नेमणूक जाल्या.
एके रातींत बेकायदा बांदकाम उबे करपाचो प्रकार गंभीर आसा. बेकायदा बांदकाम चालू उरल्यार गोंय नश्ट जावपाक चड वेळ लागचो ना, अशें उच्च न्यायालयाचे मुखेल न्यायाधीश देवेंद्र कुमार उपाध्याय हांणी म्हणलें. गोंयचे अॅडव्होकेट जनरल देवीदास पांगम हांणी ही म्हायती दिली.
गोंयांतल्या म्हामार्गांचेर आनी रस्त्या कुशीक बेकायदेशीर बांदकाम उबारपाक लागल्यात. पंचायत वाठारांतूय बेकायदा बांदकामांचें प्रमाण वाडलां. बेकायदा बांदकामां आड कारवाय करपाचो आदेश न्यायालयान दिल्या उपरांत लेगीत कांय पंचायतींनी कारवाय करूंक ना. 10 बांदकामां आड दिल्ल्या आदेशाची करवाय पंचायतींन करूंक ना. बेकायदेशीर बांदकामां चालूच उरलीं जाल्यार गोंयचो नाश जावपाक चड वेळ लागचो ना. हे खातीर उच्च न्यायालयान बेकायदा बांदकामां संबंदांत स्वेच्छा याचिका दाखल केल्या. पंचायत संचालनालय, राज्य सरकार हे याचिकेंत प्रतिवादी आसात. हाचे भायर आनीक कोणाक प्रतिवादी करचे हाचो निर्णय सुनावणी वेळार जातलो. बेकायदा बांदकामां जायत्या पंचायत वाठारांनी चालू आसात. स्वेच्छा याचिकेक लागून आतां गोंयांतल्या जायत्या पंचायतींक उच्च न्यायालयाचे कारवायेक फुडो करचो पडटलो.
‘सीआरझॅड, एनडीझॅड वाठारांतल्या बांदकामां तपासचीं’
उच्च न्यायालयाचे मुखेल न्यायाधीश देवेंद्रकुमार उपाध्याय आनी न्यायाधीश भारत देशपांडे हांचे मुखार आंतोनियो जुजे ज्योकीम डिसोझा हांचे याचिकेचेर सुनावणी चालू आसतना बेकायदा बांदकामांचो विशय चर्चेक आयलो. हे याचिकेंत गोंय सरकार प्रतिवादी आसा. पंचायत संचालनालय बेकायदा बांदकामां मोडपा विशीं आदेश दिता, मात सरपंच, पंच, सचिवां कडल्यान कारवाय जायना. 27 सप्टेंबर 2024 ह्या दिसा उच्च न्यायालयान पंचायत संचालकाक पुराय म्हायती दिवपी प्रतिज्ञापत्र सादर करपाचे आदेश दिल्यात. तशेच हाचे पयलीं 12 जुलय 2000 ह्या दिसा बेकायदा बांदकामाची तपासणी करून ती मोडपाची कारवाय करपाचे आदेश पंचायतीच्या सरपंच तशेंच सचिवांक दिल्ले. ह्या आदेशाची कार्यवाय जाय नाशिल्ले खातीर न्यायालयान हुस्को उक्तायलो. पंचायत तशेंच पालिका वाठारांत लेगीत बेकायदा बांदकामां जातात. सीआरझॅड तशेच एनडीझॅड वाठारांतल्या बेकायदा बांदकामांची तपासणी जावपाक जाय, अशें न्यायाधीशान म्हणलां. सुनावणी वेळार म्हायती घेवन हेर संबंदितांक प्रतिवादी करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
