भांगरभूंय | प्रतिनिधी
पणजी : उगवे – तेरेखोला बेकायदाे रेंवे काडटात अशी कागाळ राती साडेबारा वरांचेर करून लेगीत सकाळ मेरेन पुलिसांचो पत्तो नाशिल्ल्या घडणुकेची उच्च न्यायालयान गंभीर दखल घेतल्या. अवमान याचिकेच्या सुनावणी वेळार हे गजालीचो संदर्भ घेत बेकायदाे रेंव कापडाच्या धाडी विशीं यंत्रणा वा वेवस्थे विशीं उच्च न्यायालयान सरकारा कडेन अहवाल मागला.
गोंयांत बेकायदा रेंवे काडपाच्या प्रमाणात वाड जाता. हे विशीं उच्च न्यायालयान कारवाय करपा विशीं जायते आदेश दिल्यात. येणावळ खातें, पुलीस आनी खण खात्याच्या समन्वयान कारवाय करपाक जाय. ह्या तिनूय खात्या मदीं समन्वय आसा, अशें ह्या घडणुके वेल्यान दिसना. बेकायदाे रेंव काडपाचेर कारवाय करपा विशीं पुलीस, खण खातें आनी येणावळ खातें हांचें मदीं समन्वय आसपाक जाय. समन्वय सादपा सयत बेकायदाे रेंव काडपाचेर कारवाय करपा खातीर सध्या कशे तरेची यंत्रणा आसा, हाचेर सरकारान अहवाल सादर करचो. गोंयांतल्या मुंबय उच्च न्यायालयान हे विशीं अॅडव्होकेट जनरलाक अहवाल सादर करपाक सांगला. गोंय रिव्हर सँड प्रोटेक्टर्स नेटवर्क हांणी सादर केल्ल्या अवमान याचिकेच्या सुनावणी वेळार न्यायाधीश भारती डांगरे आनी निवेदिता मेहता हांणी हे आदेश दिल्या. अवमान याचिकेचेर 12 ऑगस्टाक फुडली सुनावणी जातली.
गोंयांत बेकायदाे रेंव काडपाचें प्रमाण वाडत आसा. बेकायदाे रेंव काडपाचेर कारवाय करपा विशीं मुंबय उच्च न्यायालयान 3 एप्रील 2025 दिसा आदेश दिल्लो. ह्या आदेशाची अंमलबजावणी सारकी जायना, असो दावो करीत उच्च न्यायालयांत अवमान याचिका दाखल केल्या. ह्या अवमान याचिकेच्या सुनावणी वेळार हे आदेश जारी जाले. याचिकादाराच्या आदोगादान उगवें – तेरेखोल हांगा घडिल्लो प्रकार न्यायालयाच्या निदर्शनाक हाडलो.
तेरेखोल न्हंयेंत केरी तशेंच उगवें हांगा बेकायदाे रेंवे काडपाचो प्रकार सेगीत सुरू आसता. 7 एप्रील 2025 दिसा राती कडेन उगवें हांगा 25 ते 30 होडयां वरवी बेकायदाे रेंव काडपाचो प्रकार सुरू आसलो. हे विशीं एकल्यान बेकायदाे रेंव काडपा विशीं कागाळ केली. पेडणें मामलेदार आनी कागाळदार घडणूक थळार पावले जाल्यार थय होड्यांनी रेंव आशिल्ली. रातीं तेरेखोल पुलिसांक बरेच फोन केले. पूण सकाळ मेरेन पुलीस पावले ना. हाचे उपरांत थंयच्यो होडयो नाच जाल्यो. हे विशीं पेडणें मामलेदारानी 8 एप्रील 2025 दिसा तेरेखोल पुलीस स्टेशनाच्या वाठारांत पुलीस निरिक्षकाक पत्र बरयलें. तशेंच हाचे पयलीं 12 नोव्हेंबर 2024 दिसा पेडणें मामलेदारांनी पुलिसांक पत्र बरयल्लें. केरी, उगवें हांगा पुलीस गस्त दवरून बेकायदाे रेंव काडपाचेर नियंत्रण दवरपाची मागणी पत्रांत केल्ली.
खांडेपार – फोंड्यां मांडवी न्हंयेंत बेकायदाे रेंवे काडपाचे सुरू आसा. हाका लागून न्हंयेची देग कोसळपाक लागल्या. तशेंच उगवें – तेरेखोल लेगीत बेकायदाे रेंव काडपाक लागून शेत जमीन उणी जावपाक लागल्या, असो दावो अवमान याचिकेंत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
