भांगरभूंय | प्रतिनिधी
मडगांवः बेंदुर्ड्यां रानांत काजीच्या झाडां पोंदा जाल्लो कोयर काडटना रानदुकरान एकल्याचेर हल्लो केलो. ह्या हल्ल्यात जखमी जाल्लो राम गोविंद गांवकार (बेंदुर्ड्यां – कुंकळ्ळी) हांकां मरण आयलें.
मेळिल्ले म्हायती प्रमाण, राम गोविंद गांवकार हो रानां वाठारांतल्या काजीच्या झाडां पोंदा जाल्लो कोयर काडपाक गेल्लो. ह्या वेळार ताचेर रानदुकरान हल्लो केलो. तातूंत तो जखमी जालो. उपरांत ताच्या कुटुंबान ताका उपचारा खातीर बाळ्ळेच्या भलायकी केंद्रांत व्हेलो. तपासणी उपरांत वैजकी अधिकाऱ्यांनी ताका मरण आयिल्ल्याचें सांगलें. हाचे उपरांत कुंकळ्ळी पुलिसांक हे विशीं म्हायती दिली. रामाचो भाव रमेश आनी पूत सत्येंद्र हांचे कडेन पुलिसांनी चवकशी केली तेन्ना रानांत काजीच्या झाडां पोंदा जाल्लो कोयर काडपाक गेल्ले तेन्ना तांचेर रानदुकरान हल्लो केल्लो आनी तो जखमी जाल्ल्याचें तांणी सांगलें.
हे प्रकरण कुंकळ्ळी पुलिसांनी असौमीक मरण म्हूण नोंद केले. दक्षीण गोंय जिल्हो हॉस्पिटलाच्या मॉर्गात कूड पोस्टमार्टमा खातीर दवरल्या. पुलीस निरिक्षक डायगो ग्रासियस हांच्या मार्गदर्शना खाला आदित्य सावंत फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
