भांगरभूंय | प्रतिनिधी
कांय वर्सां फाटीं तियात्रांत वावुरचें अशें म्हाका दिसलें आनी हांवें त्या मळार उडी घेतली. तियात्र मळार येवन वेगवेगळे तरेच्या कलाकारां कडेन म्हजी भेट जाली. दिग्दर्शक सांगता तशी भुमिका पाळपाचें काम सगळे कलाकार करताले. आपले जिणेंत तांचें दुसरें रूप आसत, पूण माचयेर वावुरतना सदांचे जिणे परस वेगळी भुमिका करची पडटाली. थोडे इतले बरे तरेन पाळटाले की तांकां वळखूंक पासून कुस्तार जातालें. आनी अशेच खूब जण अवॉर्ड पासून जिखून वताले. हो संवसार एक रंगमाची आनी ह्या संवसारांत आशिल्ले सगळे लोक हे कलाकार.
दिसता तशें नासता, देखुनूच मनीस फसता. मनशाचें भायलें रूप सगळ्यांक दिसता, पूण तांचें भितरलें कोण पळेता? तोंडार हांसता भितरल्यान लासता आनी त्याच उज्यांत मनीस कांय फावटी खूब वस्तू एक करता. गरम पासून लागनासतना कांय पावटी मनशाक लासून उडयता आनी त्या लासपाचो वास पासून येना. कोण आपूण बरो मोगी म्हण दाखोवपाची भुमिका पाळटा जाल्यार, कोण आपूण विस्वाशी म्हण आपलो अभिनय करता. कांय जाणां भुमिका करतना वळखूंक खूब कठीण लागता. कारण तांची भुमिकाच तशी. माचयेर जितलो चड अणभव, तितलो तूं बरो अभिनय करूंक शिकता. तोच अणभव सदांचे जिणेंत तो घालता आनी कशे तरेन जिखतलो हाचेर पुराय लक्ष केंद्रीत करता. खऱ्या जिवितांत वेगळेंच कितें आसता.
कांय फावटीं थोडे अभिनय अशे तरेन करतात, की ते हो अभिनय करतात म्हण पासून दिसनात. तांकां एक “बॅस्ट एक्टर अवॉर्ड” आपले सदांचे भुमिके पासत दिवंक फावो. ह्या संवसारांत जरी आसलो कसलोय “बॅस्ट एक्टर अवॉर्ड” आशिल्लो जाल्यार तो कोणाक दिवंचो हें पारखूंक भोव कठीण जातासलें. कारण सगळोच लोक आपूण बरो म्हण दाखोवपाचो खूब प्रयत्न करतले आशिल्ले. तांचे मागीर थोडे दिग्दर्शकूय आसतले आशिल्ले. कशे तरेन आपूण इतलो पाड आसून पासून इतलो बरो म्हण दाखोवप हें तांच्या रग्तांत आसता म्हण अशें करप तांकां शक्य जाता.
कोण बाबडे आपूण ही भुमिका करूंक सोदतात पूण कांय कारणाक लागून तांच्यान हें करूंक जायना, ते मागीर आपले जिणेंत फसतात. आनी लोकाचे नदरे फुडें हेच पाड जातात. पूण जे बरो अभिनय करतात ते वांचतात. आतां जाल्यार ह्या संवसारांत कलाकार खूब वाडल्यात जे खूब बरे तरेन आपलो अभिनय करतात. घडये ह्याच कारणाक लागून स्वता प्रमाणीक मनशांची संख्या देंवूंक लागल्या. फट मारपाचो अवॉर्ड, प्रामाणीक म्हण दाखोवपाचो अवॉर्ड, दुसऱ्यांचें पाड घालून आपणें कांय करूंक ना म्हणपाचो अवॉर्ड, दुसऱ्यांक आदार दितां म्हण दाखोवपाचो अवॉर्ड, दुसऱ्याच्या सुखांत आपूण सुखी अशें दाखोवपाचो अवॉर्ड, खरो इश्ट म्हण सांगूंक भोंवपाचो अवॉर्ड… अशी ही वळेरी व्हड आसा जी सोंपची ना, असलेय बी अवॉर्ड मुखार येयत.
‘हार वता म्हण गांयदोळ गेलो, पांयां पोंदा चिड्डून मेलो’, अशेच थोडे नवे कलाकार तियात्र मळार भितर सरतात आनी कांय फावटीं तांकां तिगूंक सुयोग आसना. आपणाच्यान जाता ते परीं ते प्रयत्न करतात, पूण तांचे ते प्रयत्न निर्फळ जातात, तेन्ना तांकां एकूच उपाय सुचता तो म्हणल्यार रडप. जो दुसऱ्यां फुड्यांत दुकां गळयता तांकां कांय फावटीं वालोर आसता आनी देखून हीं दुकां पळोवन कांय जण तांकां लागीं दवरतात. मागीर ते रीग घेतात आनी केन्नाय अवॉर्डाकूय पात्र जातात. कांय जण पयशे दिवन हो पुरस्कार घेवंक भारीं वावुरतात आनी पयशे संवसारांत उलयतात. पयशे उलयतात तितलो पावर कोणाकूच नासता. पयशांनी तुज्यान कितेंय विकतें घेवंयेता आनी आतां जाल्यार मनशा कडेन तो चडूच जाला. पूण आपणा कडेन तो आसा म्हूण कोण दाखोवंचो ना, ही बी एक भुमिका. गरीब दुबळ्या परीं मनीस भोंवता आनी असल्या अभिनयाकूय केन्ना- केन्ना अवॉर्ड फावो जाता.
खरो अवॉर्ड कोणाकूय जाय जाल्यार फकत एकूच उपाय आनी तो म्हणल्यार प्रामाणीकपण आपणावप. लोक तुका बरो म्हणूं वा ना म्हुणूं, तूं बरें काम करीत फुडें वच, तुजें समाधान कर. ह्या तुज्या प्रामाणीकपणाक खरो अवॉर्ड फावो जातलो. दुसऱ्यांक दाखोवंक अभिनय करचे परस, प्रामाणीक जीण जग, दुसऱ्याक मान दी. तेन्नाच तुजे जिणेक वालोर आसतलो. चिंतून पळे मनशा तूं तो कलाकार वा.. ?
(लिपयांतर – विन्सी क्वाद्रूस – 9822587498)
स्लिफॉन सिमॉयस,
केपें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
