भांगरभूंय | प्रतिनिधी
संवसारीक फुटबॉल सर्तींत काल बॅल्जियम आनी स्वित्झर्लेण्ड ह्या पंगडांनी आपआपली मॅच जिखली, जाल्यार अणभवी उरुग्वेक दक्षीण कोरियाचो बचाव भेदपाक अपेस आयिल्ल्यान मॅच गोलाविणें बादाबाद सोंपली.
एफ गटांत जाल्ले मॅचींत बॅल्जियमान कॅनडा पंगडाक 1-0 असा हारयलो. मॅचींतलो एकोडो आनी म्हत्वाचो गोल मिकी बत्सुआईन केलो. कॅनडा 36 वर्सांनी संवसारीक सर्तींक खेळटा. कॅनडा 1986 उपरांत पयले खेपे संवसारीक सर्तीक पात्र जाला.
मॅचींतलो चडसो वगत कॅनडान आपलो वेळ बॅल्जिमयाच्या क्षेत्रांत घालयलो. पूण, ताच्या खेळगड्यांक गोल करपाक जमलो ना. 10व्या मिनटाक कॅनडाक गोल करपाची भांगराळी संद मेळिल्ली. अल्फोंसो डॅव्हिडाचो बॉलाक हात लागिल्ल्यान रॅफ्रीन पॅनल्टी कीक दिल्ली. पूण, बॅल्जियमाचो गोलकीपर थिबाउट कर्टोइसान अल्फोंसोची पॅनल्टी किकीचो उत्कृश्ट रितीन बचाव केलो. अल्फोंसोची आंतरराष्ट्रीय कारकिर्दींतली ही पयली पॅनल्टी कीक आशिल्ली.
मजगतीं, मध्यांतर जावपाक कांय मिनटां बाकी आसतना मिकीन कॅनडाच्या डिफॅण्डरांक चकयत 44व्या मिनटाक गोल केलो. ते उपरांत दुसऱ्या अर्दाच्या 79व्या मिनटाक कॅनडाक गोल करपाची आनीक एक संद आशिल्ली. पूण, हे खेपेय बॅल्जियमाच्या गोलकीपरान उत्कृश्ट रितीन प्रतिसपर्धी पंगडाचो यत्न फुकट घालयलो.
मजगतीं, जी गटांत जाल्ले मॅचींत स्वित्झर्लेण्डान कॅमरुनाक लेगीत 1-0 अशाच फरकान हारयलो. एकोडो गोल ब्रील अॅम्बोलोन केलो.
तशेंच एच गटांतले मॅचींत दक्षीण कोरियान उरुग्वेक गोलाविणें बादाबाद आडायलो. दोनूय पंगडांक गोल करपाच्यो बऱ्यो संदी फावो जाल्ल्यो. पूण, संदीचें गोलान रुपांतर करपाक तांकां जमलें ना. उरुग्वे सारक्या बळिश्ट पंगडाक अखेर मेरे दक्षीण कोरियाचो बचाव भेदपाक जमलो ना.
दुसऱ्या अर्दांत उरुग्वेन आक्रमक खेळ केलो. पूण, फिनिशींगच्या उणावाक लागून तांकां कोरियाचो बचाव भेदपाक जमलो ना. पुर्ण मॅचींत उरुग्वेन चड आक्रमण केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
