भांगरभूंय | प्रतिनिधी
राष्ट्रकूल खेळां सर्तीच्या 11व्या दिसा भारतान बॅडमिंटनांत तीन भांगरा पदकां जिखलीं. जाल्यार एक पदक टेबल टॅनिसांत मेळयलें. अशे तरेन भारतान 22 भांगरा पदकां सयत वट्ट 61 पदकां मेळयलीं. पदक तकट्यांत भारत चवथे सुवातेर आयलो.
बॅडमिंटनांत स्टार खेळगडी पी व्ही सिंधून बायलांच्या एकोड्या गटांत जाल्यार लक्ष्य सेनान दादल्यांच्या एकोड्या गटांत भांगरा पदक जिखलें. ते उपरांत दोट्टी गटांत सात्विक साईराज रेंकीरेड्डी आनी चिराग शेट्टी हे जोडयेन लेगीय फायनल जिखून भांगरा पदक मेळयलें. फायनलींत भारताचे जोडयेन सीन वेंडी आनी वेन लेन हे इंग्लंडाचे जोडयेक 21-15 आनी 21-13 अशा फरकांनी हारयली.
20 वर्सां पिरायेचो लक्ष्य सेनान फायनलींत मलेशियाच्या जेई यंगाक तीन गेमी मेरेन चलिल्ले मॅचींत 19-21, 21-9 आनी 21-16 अशा फरकांनी हारयलो. पयली गेम ताणें 19-21 फरकान वगडायली. पूण, दुसरे गेमींत ताणें जबरदस्त पुनरागमन करीत ती 21-9 फरकान जिखून मॅच 1-1 अशी बरोबरींत हाडली. तिसरे गेमींत लक्ष्य सेनान 21-16 फरकान जिखून भारताक भांगरा पदक जिखून दिलें.
लक्ष्य सेना पयलीं दादल्यांच्या एकोड्या गटांत पी कश्यपान 2014त जाल्ले राष्ट्रकूल खेळां सर्तींत भांगरा पदक जिखिल्लें.
ते पयलीं पी व्ही सिंधून फायनलींत कॅनाडाचे मिशेल ली हिका 21-15 आनी 21-13 अशा सरळ गेमींनी हारोवन भांगरा पदक जिखलें. राष्ट्रकूल खेळां सर्तींत सिंधून मेळयिल्लें हें पयलें भांगरा पदक थारलें. बायलांच्या एकोड्या गटांत सायना नेहवालान 2018त जाल्ले राष्ट्रकूल खेळां सर्तींत भांगरा पदक जिखिल्लें. फायनलींत तिणें सिंधूक हारयिल्ली.
अचंता शरथ कमलाक 16 वर्सांनी भांगर
टेबल टॅनीस सर्तीच्या एकोड्या गटांत भारताच्या 40 वर्सां पिरायेच्या अचंता शरथ कमलान इंग्लंडाच्या लियाम पिचफोर्डाक 4-1 फरकान हारोवन भांगरा पदक जिखलें.
शरथ कमलान 16 वर्सांनी राष्ट्रकूल खेळां सर्तींत भांगरा पदक जिखलें. हाचे पयलीं 2006त ताणें ह्या खेळांत भांगरा पदक जिखिल्लें. 2022त ताणें तीन भांगरा पदकां जिखलीं. एकोड्या गटा खेरीत ताणें मिश्र दोट्टी आनी दादल्यांच्या दोट्टी गटांत भांगरा पदक जिखिल्लें. वट्ट राष्ट्रकूल खेळां सर्तीचो विचार केलो जाल्यार ताणें सात भांगरा पदकां जिखलीं.
मजगतीं, दादल्यांच्या एकोड्या गटांत साथियान गणानाशेखरनान इंग्लंडाच्या ड्रॉन्कहेलाक 11-9, 11-3, 11-5, 8-11, 9-11, 10-12 आनी 11-9 अशा फरकांनी हारोवन कांश्या पदक जिखलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
