भांगरभूंय | प्रतिनिधी
फुडल्या म्हयन्यांत जावपी चॅम्पियन्स ट्रॉफी खातीर वेंचिल्ल्या 15 वांगड्यांच्या पंगडांत मोहम्मद शमीचें पुनरागमन जालां. ताचे खेरीत जसप्रीत बुमराची लेगीत निवड केल्या. जाल्यार शुभमन गिलाक उप मुखेली केला. मुखेली रोहीत शर्माच्या फुडारपणा खाला खेळपी पंगडांत यशस्वी जयस्वालाक पयले खेपे वन डे पंगडांत सुवात दिल्या. तो सर्तींत राखीव ओपनर आसतलो.
होच पंगड फेब्रुवारीचे सुरवातीक इंग्लंडा आड तीन वन डे खेळटलो, हातूंत हर्षित राणाक बुमराचो बॅकअप म्हणून वेंचला. तो माळेंत दोन मॅची खेळचो ना.
फास्ट बॉलर मोहम्मद सिराजाक सुवात मेळूंक ना. अंदूंच्या हंगामांत सगल्यांत चड 20 विकेटी घेवपी अर्शदीप सिंग तिसरो फास्ट बॉलर आसतलो.
शमी आपली निमाणी आंतरराष्ट्रीय वन डे मॅच 2023त जाल्ले संवसारीक वन डे सर्तींत खेळिल्लो. तातूंत ताणें 24 विकेटी घेतिल्ल्यो.
निवड समितीक बुमरा आनी कुलदीप यादव हांचे तंदुरुस्ती विशीं दुबाव आशिल्लो. नोव्हेंबर म्हयन्यांत कुलदीपाचेर हार्नियाचें ऑपरेशन जाल्लें. तेन्ना सावन तो आंतरराष्ट्रीय क्रिकेटी पसून पयस आशिल्लो. जाल्यार बॉर्डर-गावस्कर ट्रॉफीचे निमाणे टॅस्टींत बुमरा जखमी जाल्लो.
विराट कोहली तिसरे सुवातेर खेळटलो आनी मदली फळी ही 2023चे संवसारीक वन डे क्रिकेट सर्तींत खेळिल्लीच आसा. श्रेयस अय्यर आनी लोकेश राहुलाची निवड केल्या. हार्दिक पांड्या, रवींद्र जडेजा आनी अक्षर पटेल लेगीत आसतलो. राहुला खेरीत 15 वांगड्यांच्या पंगडांत ऋषभ पंत दुसरो विकेटकीपर आसतलो. निवड समितीन संजू सॅमसनाक कुशीक दवरन पंताची निवड केल्या. वॉशिंग्टन सुंदर पंगडांत चवथो अश्टतासांचो खेळगडो आसतलो.
भारताचो अ गटांत आस्पाव केला. आपली पयली मॅच 20 फेब्रुवारीक बांगलादेशा आड खेळटलो. ते उपरांत 23 फेब्रुवारीक पाकिस्ताना आड आनी 2 मार्चाक न्युझिलॅण्डा आड खेळटलो. भारत सरकारान पंगडाक पाकिस्तानाक वचपाक परवानगी दिवंक नाशिल्ल्यान भारताच्यो सगल्यो मॅची दुबय जातल्यो.
चॅम्पियन्स ट्रॉफी पयलीं भारताचो पंगड इंग्लंडा आड तीन वन डे मॅचींची माळ खेळटलो. ह्यो मॅची 6,9 आनी 12 फेब्रुवारीक जातल्यो.
विजय हजारे ट्रॉफींत उत्कृश्ट प्रदर्शन करपी करुण नायराक पंगडांत सुवात मेळूंक ना. नायरान सात मॅचींनी 752 धांवड्यो केल्ल्यो.
चॅम्पियन्स ट्रॉफी खातीर वेंचिल्लो पंगडः रोहीत शर्मा (मुखेली), शुभमन गील, लोकेश राहुल, विराट कोहली, हार्दिक पांड्या, श्रेयस अय्यर, अक्षर पटेल, वॉशिंग्टन सुंदर, कुलदीप यादव, जसप्रीत बुमरा, अर्शदीप सिंग, मोहम्मद शमी, यशस्वी जयस्वाल, ऋषभ पंत, रवींद्र जाडेजा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
