भांगरभूंय | प्रतिनिधी
जिल्हो प्रशासनाची समिती येताच आयोजका सयत पळोवप्यांच्यो फुज्ज्यो
भांगरभूंय । प्रतिनिधी
मडगांव : सुरावले बुधवारा धिरयांचें आयोजन केल्लें. कोलवा पुलीस कारवाय करपाक अपेशी थारता अशें दिसून आयलें. जिल्हो प्रशासना कडल्यान स्थापन केल्ली समिती घडणुकेचे सुवातेर पावताच सुरावलेच्या धिरयो आयोजकां सयत पळोवप्यांची गर्दी ना जाली.
धिरयांचें आयोजन करप हो कायद्यान गुन्यांव, मात साश्टीच्या दर्यादेग वाठारांत बिनधास्त धिरयो आयोजीत करतात. तांचो व्हिडीओ लेगीत व्हायरल जाता. कोलवा पुलीस कारवाय करिना, असो आरोप थळावे लोक करतात.
डिसेंबरांत कोलवा वाठारांत धिरयांचें आयोजन केल्लें. ते उपरांत 3 जानेवारीक कोलवा वाठारांत परतून एकदां धिरयो आयोजीत केल्ल्यो. ताचे व्हिडीओ व्हायरल जाले उपरांत कोलवा पुलिसांनी दोन आयोजकांचेर गुन्यांव नोंद केला. मात अजून लेगीत तांची वळख पटूंक ना. आतां बुधवारा परतून एकदां धिरयांचें आयोजन केलां, अशी म्हायती जिल्हो प्रशासना कडल्यान स्थापन केल्ले समितीक मेळ्ळी.
मामलेदार गौरव गांवकार हांच्या मार्गदर्शना खाला पंगड घडणुकेचे सुवातेर पावताच सुरावले आयोजीत केल्ल्यो धिरयो बंद दवरल्यो. धिरयां खातीर जमा जाल्ली गर्दी लेगीत धिरयो बंद दवरले उपरांत थंयच्यान गेले. साश्टी म्हाला सयत दक्षीण गोंयांतल्यो धिरयो कांय म्हयन्यां आदीं दक्षीण गोंय जिल्होधिकाऱ्यान आदेश जारू करून ते उपरांत समिती लेगीत स्थापन केल्ली. मात ते उपरांत लेगीत धिरयो चालूच आसात. हाची देख बुधवारा परतून आयिल्ल्यान कोलवा पुलिसां सयत जिल्हो प्रशासन धिरयो बंद करपाक अपेशी थारिल्ल्याचें दिसून आयलां. कोलवा पुलीस कोणाच्या तरी चेपणा खाला काम करता, असोय अरोप सध्या ह्या वाठारांतल्यान जाता.
आयोजकां सयत पळोवप्यांचेर कारवाय करपाचे निर्देश
धिरयो आयोजनाची दखल दक्षीण गोंय जिल्होधिकाऱ्यान घेतल्या. दक्षीण गोंय अतिरिक्त जिल्होधिकारी रमेश गांवकार हांणी परतून नव्यान आदेश जारी करून कोलवा पुलिसांक धिरयो प्रकरणांत उच्च न्यायालयाचो आदेश पाळचो, धिरयो आयोजक, जमनीचो धनी हाचे सयत धिरयो पळोवपाक आयिल्ल्यांची म्हायती घेवची, अशें सांगून खर कारवायेचे निर्देश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
