भांगरभूंय | प्रतिनिधी
खबरां संस्था
चेन्नयः तरणाटो ग्रँडमास्टर डी गुकेशाच्या सेगीत आठव्या जैताच्या बळग्यार उक्त्या गटांत भारताच्या ब पंगडान बुद्दिबळ ऑलिम्पियाड सर्तीचे आठवे फेरयेंत नंबर वन सिडेड अमेरिकेक 3-1 असो हारीचो धपका दिलो.
भारताच्या पंगडांतल्या पयल्या पटा वयल्या गुकेशान संवसारीक क्रमवारींत पांचवे सुवातेर आशिल्ल्या फॅबिआनो कारूआनाक 45वे चालींत हारयलें. तशेंच निहाल सरीन आनी आर प्रज्ञानंद हांणी दरेकी लेव्हॉन अरोनियन आनी वेस्ली सो हांचे कडेन बोरोबोरी करून भारताच्या जैतांत म्हत्वाचें योगदान दिलें.
ह्याच गटांत नंबर दोन सिडेड भारताच्या अ पंगडांन आर्मेनिया कडल्यान 1.5-2.5 अशा फरकान हार खाल्ली. पयल्या पटा वयल्या पी हरिकृष्णानाक गॅब्रिएल सर्गिसियनान उमळशीकेचे मॅचींत 102 चलींत हारयलेें. विदित गुजराथी, अर्जुन इरिगेसी आनी एसएल नारायण हांच्यो मॅची बरोबोरींत सुटिल्ल्यान भारताच्या अ पंगडाक हाख खावची पडली. भारताच्या क पंगडाक पेरून 1-3 अशें हारयलें.
बायलांच्या गटांत नंबर वन सिडेड भारताच्या अ पंगडाक युक्रेनान 2-2 अशें बोरोबोरीत आडायलें. कोनेरू हम्पी, द्रोणावल्ली हरिका, आर वैशाली आनी तनिया सचदेव हांच्यो मॅची बोरोबोरीत सुटल्यो. भारताच्या ब पगंडान क्रोएशियाचेर 3.5-05 अशी मात केली. वंतिका अगरवाल, पद्मिनी राऊत आनी दिव्या देशमुख हांणी आपापल्या मॅची जिखल्यो. भारताच्या क पंगडांन मात पोलंडा कडल्यान 1-3 अशी हार घेतली. तांच्या प्रत्युशा बोड्डा आनी पी व्ही नंधिधा हांका हार खावची पडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
