भांगरभूंय | प्रतिनिधी
बाळासाहेब ठाकरे हांकां जें जमलें ना तें देवेंद्र फडणवीस हांणी करून दाखयलें, आनी आमी दोगूय भाव एकठांय आयले अशें राज ठाकरे हांणी आपल्या उलोवपाचे स्टायलींत उद्धव ठाकरे हांकां मिठी मारले उपरांत म्हणलें, आनी ताका नेटाच्यो ताळयो लेगीत मेळ्ळ्यो. राज ठाकरे हांकां आतां मेरेन ताळयांचो केन्नाच उणाव भासलो ना. पूण त्या ताळयांचें मतांत मात केन्नाच रुपांतर जालें ना, आनी हाचे मुखारूय तें जातलें अशेंय सांगूंक येवचें ना. सुमार 20 वर्सां उपरांत उद्धव आनी राज ठाकरे हे भाव एकठांय उबे ‘रावले’ आसले तरी ह्या दोगांय खातीर ती एक राजकी गरज आशिल्ली आनी ती गरज लक्षांत घेवनूच तांणी हें सगलें नाटक घडोवन हाडलें हाचे पेल्यान वचून हे घडणुके कडेन कोणेय पळोवपाची गरज आसा अशें म्हणूंक येवचें ना. ‘बुडटल्याक खंय काडयेचो आदार’ अशी एक पोरणी म्हण आसा, तेच धरतेर ह्या दोगांचेंय पेंपारें वाजोवन एकठांय येवपाचो निर्णय म्हणल्यार बुडटल्या ठाकरे भावांक ‘हिंदी’ चो आदार अशें म्हणूं येतलें. आतां हेच काडयेचो आदार घेत ठाकरे भाव सद्याच्या नेटाच्या राजकी प्रवाहांत उरफाटे दिकेन पेंवत वचून पलतडी वचपाचें आसात, आनी तें तांकां कितले मेरेन शक्य जातलें हाचो आयज तरी सगल्यांकूच दुबाव आसा. राज ठाकरे हांच्या ताळयो घेवपी विधानाचेर मुख्यमंत्री देवेंद्र फडणवीस हांणी दिल्ली प्रतिक्रिया तशी खूब कितें उलोवन वता. तांकां एकठांय हाडपाचें स्रय ते म्हाका दिता आसत जाल्यार बाळासाहेब खंय आसात थंय सावन ते म्हाकाच आशिर्वाद दितले अशें फडणवीस हांणी म्हणलें. फक्त मराठीच्या नांवा खाला धोंगीपणाचें हें जें नाटक घडोवन हाडलां तें लोकांक कितले मेरेन रुचतलें हो प्रस्न सद्या चड म्हत्वाचो आसा.
राजकारणांत कांयच अशक्य अशें ना, हेंच उद्धव आनी राज ठाकरे हांणी सुमार दोन दसका उपरांत तांचे मदली राजकी दुस्मानकाय सोंपोवन एकामेकांक मिठी मारून परतून एकदां सिद्ध केलें. उद्धव ठाकरे आसूं वा राज ठाकरे आयचे परिस्थितींत तांचे राजकी वजन इतलें देंवलां की तांच्या राजकी अस्तित्वाकूच घात निर्माण जाला. अशे परिस्थितींत तांच्या सल्लागारांनी तांकां एकठांय येवपाचो सल्लो दिवचो आनी तो तांणी मानून दोगांनीय सामकी ताकतिकेन अशी गळोभेट घेवप हें सगलें तशें पचोवंक कठीण आसलें तरी कसलेंय मोल मेजून आपलें राजकी अस्तित्व तिगोवन दवरप हेच खातीर हो सगलो खटाटोप आशिल्लो हें आतां लिपून उरिल्लें ना. मराठी भाशेच्या हिताच्या नांवा खाला आमी परतून ताळी दिल्ल्याचो भास निर्माण करून महाराष्ट्रान आमकां तकलेर घेवचें अशें कितेंशें उद्धव आनी राज हांकां अभिप्रेत आशिल्लें तरी तांकां अजून खुबश्या कसवट्यांचेर तें सिद्ध करचें पडटलें, आनी तांचो फुडलो मार्गूय तांकां आयज दिसता तितलो सोंपो निश्चितूच ना. उद्धव आनी राज ठाकरे हांचे मदली सुमार दोन दसकांची राजकी दुस्मानकाय महाराष्ट्रच न्हय जाल्यार सगलो देश जाणून आसा. फाटल्या कांय वेंचणुकांनी ह्या दोगांनीय एकामेकां आड आड्डी मारून आपलेंच प्यादें कशें श्रेश्ठ आसा हें दाखोवपाचो जो यत्न केलो तोवूय लोकां मुखार आसा. अशा वेळार मराठीच्या हिताच्या नांवा खाला हिंदीच्या काडयेचो आदार घेत राजकी सुवार्था खातिरूच ठाकरे भाव एकठांय आयल्यात हो जो समज लोकांच्या मनांत निर्माण जाला तो पयस करपाचें खूब मोटें काम उद्धव आनी राज ह्या दोगांकूय करचें पडटलें.
मुंबय महापालिकेचे वेंचणुकेचेर लक्ष दवरून उद्धव आनी राज ठाकरे हांणी एकठांय येवपाची ही संहिता बरयल्या हातूंत कसलोच दुबाव ना. सभेंत जाल्यार दोगांनीय आपल्या उलोवपांतल्यान महानगरपालिका आनी राज्यांतूय सत्ता हातासूं अशें संकेतूय दिले, पूण तशें उलोवप करचे पयलीं आमी आयज नेमके खंय चाचपडत आसात हाचेंय भान दवरिल्लें जाल्यार घडये तांणी इतली उडी मारपाचे धाडस करचे नाशिल्ले. हिंदीच्या सक्तीचो गरजे भायर बोवाळ घालून महाराष्ट्रांतल्या लोकांच्यो भावना भडकावप होच ठाकरे भावांचो यत्न आसा हें आतां स्पश्ट जालां. तातूंतल्यान आपलो राजकी सुवार्थ सादून घेवं अशें जर तांकां दिसता आसत जाल्यार मात तांकां कितले मेरेन यश मेळटलें हो दुबाव आसा. मराठीक न्याय दिवपाक फाटलीं खूबशीं वर्सां आमी कशें फाटीं उरले हाचो विचार आदीं केल्लो जाल्यार आयचें हें ढोंगीपण चव्हाट्यार येवचें नाशिल्लें. दोगूय भावांनी आपली दीर्घ काळाची दुस्मानकाय सोंपोवन एकठांय येवपाक तसो कोणाचो विरोध नाशिल्लो. कुटुंबीक नातें सांबाळपा खातीर आनी बाळासाहेब ठाकरे हांचो वारसो मुखार व्हरपाच्या उद्देशान हें मिलन आदीं घडोवन हाडिल्लें जाल्यार घडये पुराय महाराष्ट्र उद्धव आनी राज हांचे फाटल्यान दिसपाचो. पूण तशें जालें ना.
राजकी सुवार्था खातीरच आमी एकठांय आयल्यात हाची कबुलीय अप्रत्यक्षरितीन शेनवारच्या मेळाव्यांत दोगांनीय दिली आनी हें ढोंगीपण लोकांक आवडटलें अशें तांकां दिसता आसत जाल्यार तो भ्रम तांणी पयलींच पयस करचो. लोकूय आतां खूबशे समजूतदार जाल्यात आनी तांकां गृहीत धरुनच हें ढोंगीपण केलां आसत जाल्यार ती खूब मोटी चूक थारतली.
ठाकरे भावांनी मराठीच्या हिता खातीर आमी एकठांय येत आशिल्ल्याचें चित्र निर्माण करून हिंदी भाशा सक्तीची करतले असो माहोल तयार केला. हिंदीच्या सक्तीची फटीची भिरांत दाखोवन ताच्या आदाराचेर एकठांय येवपाचें नाटक रंगयलें. आतां तांचो नेमको अजेंडा कसलो आशिल्लो हेंवूय समजून आयलें तें एक बरें जालें. राज्य सरकारान जे निर्णय घेतले तें समजून घेतल्यार हिंदी सक्तीच्या नांवा खाला आड्ड्यो मारपाचें पितूळ उक्तडार आयलां. सरकारान घेतिल्ल्या निर्णया प्रमाण त्रिभाशा सुत्राक अणसरून पयली सावन तिसरी मरेन हिंदीचो फक्त मौखीक अभ्यास निर्धारीत केल्ल्याचें सांगतात आसत जाल्यार ताका विरोध करपाचें कारण कितें आनी निमाणें हो निर्णय स्थगीत केले उपरांत मेळोवो आयोजीत करप म्हणल्यार खंयचेय परिस्थितींत एकठांय येवपाचो अजेंडा मुखार व्हरपा बगर तांचे कडेन दुसरो पर्याय नाशिल्लो आनी मुखार घडये अशी संद मेळटलीच हाचीय तांकां खात्री नासुये. निमाणें हिंदी हीच देशाची एकसुरी संपर्क भाशा जावंक शकता हें मान्य आसत जाल्यार ताका असो विरोध करप कितले मेरेन योग्य आसा हाचोय विचार करचो पडटलो. इंग्लीशीच्या वाडट्या वर्चस्वाचेर आमी तोंड फुटसर उलयतात मागीर हिंदी आड हो पवित्रो कित्याक हाची जाप मेळना. हिंदीची सक्ती जो मेरेन करिनात तो मेरेन तरी अश्यो गजाली टाळूंक जाय. हिंदीची सक्ती करतात हो दुश्प्रचार आडावपा खातीर केंद्र सरकाराक आतां पावलां उबारचीं पडटलीं. ‘हिंदी’ काडयेचो आदार घेवन बुडटल्या ठाकरे भावांचें मिलन एकदाचें जालें, आतां तांचे मनोमिलन जावचें हाचीच सगले वाट पळयतात.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
