भांगरभूंय | प्रतिनिधी
फाल्यां सावन सुरू जातलें प्रवेशा खातीरचें कावंसिलींग
पणजी : राज्यांतलो पद्वी उपरांतचो बी. एड. अभ्यासक्रम प्रवेशा खातीरची निमाणी गुणवत्ता वळेरी जाहीर केल्या. प्रवेशाचें कावंसिलींग फाल्यां ४ ते ६ जून ह्या काळांत जातलें.
२८ मेक हंगामी गुणवत्ता वळेरी जाहीर केल्ली. हंगामी गुणवत्ता वळेरी जाहीर जाले उपरांत उमेदवारां कडल्यान हरकती मागयिल्ल्यो. ह्या हरकतींचो विचार केले उपरांत आतां निमाणी गुणवत्ता वळेरी जाहीर केल्या. गुणवत्ता वळेरी dhe.goa.gov.in हे वेबसायटीचेर उपलब्ध आसा. पर्वरीच्या एससीईआरटी इमारतीच्या दुसरे माळयेवेल्या परीशद घरांत कावंसिलींग जातलेञ. सकाळीं १० ते सांजेवेळार ४.३० वरां मेरेन कावंसिलिंग चलतलें. फाल्यां ४ तारखेर सर्वसामान्य गटांतल्या प्रवेशाचें कावंसिलिंग जातलें. ५ आनी ६ जुनाक एससी, एसटी, ओबीसी, इडब्लूएस ह्या गटांतल्या प्रवेशांचें कावंसिलींग जातलें. बी. एड.च्या ३२० सुवातां खातीर १०१८ प्रवेश अर्ज आयिल्ले. उपलब्ध सुवातांच्या तीन पटी परस चड अर्ज आयिल्ल्यान प्रवेशा खाती गर्दी आशिल्ली.
पद्वी उपरांतच्या दोन वर्सांच्या बी. एड. अभ्यासक्रमा खातीर २५ एप्रील सावन अर्ज स्वीकारपाक सुरवात जाल्ली. ज्या विद्यार्थ्यांनी पद्वीच्या निमाण्या वर्साची परीक्षा दिल्या. तांणीय अर्ज केल्यात. राज्यांत तीन महाविद्यालयांनी बी. एड. (पदवी उपरांतचो) अभ्यासक्रम आसा. आल्तिनोच्या निर्मला इन्स्टिट्यूटांत १०० विद्यार्थ्यांक प्रवेश दितात. फर्मागुडी – फोंडेंच्या जीव्हीएम्स आनी पीईएस महाविद्यालयांत दरेकी ११० विद्यार्थ्यांक प्रवेश दितात. तिनूय महाविद्यालयांनी मेळून ३२० सुवातो आसात. हातुंतल्यो कांय सुवातो राखीव दवरल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
