बी. एड.च्या ३२० सुवातां खातीर १०१८ प्रवेश अर्ज

भांगरभूंय | प्रतिनिधी

हंगामी गुणवत्ता वळेरी २८ मेक जातली जाहीर

• २९,३० मेक कागाळीं खातीर मुजत
• २ जुनाक निमाणी गुणवत्ता वळेरी
• ४ ते ६ जून प्रवेशा खातीर कावंसिलींग

पणजी : राज्यांतल्या बी. एड.च्या ३२० सुवातां खातीर १०१८ प्रवेश अर्ज आयल्यात. उपलब्ध सुवातांच्या तीन पटीन चड अर्ज आयिल्ल्यान प्रवेशा खातीर सर्त निर्माण जाल्या. प्रवेशा खातीरची हंगामी गुणवत्ता वळेरी २८ मेक जाहीर जातली अशी म्हायती उच्च शिक्षण संचालक भूषण सावयकार हांणी दिली.
पद्वी उपरांतच्या दोन वर्सांच्या बी. एड. अभ्यासक्रमा खातीर २५ एप्रील सावन अर्ज स्विकारपाक सुरवात जाल्ली. ज्या विद्यार्थ्यांनी पद्वीच्या निमाण्या वर्साची परीक्षा दिल्या तांणीय अर्ज केल्यात. राज्यांत तीन महाविद्यालयांनी बी. एड. (पद्वी उपरांतचो) अभ्यासक्रम आसा. आल्तिनोच्या निर्मला इन्स्टिट्यूटांत १०० विद्यार्थ्यांक प्रवेश दितात. फर्मागुडी – फोंडेंच्या जीव्हीएम्स आनी पीईएस महाविद्यालयांत दरेकी ११० विद्यार्थ्यांक प्रवेश दितात. तिनूय महाविद्यालयांनी मेळून ३२० सुवातो आसात. हातुंतल्यो कांय सुवातो राखीव दवरल्यात.
मेळिल्ले म्हायती प्रमाण, २८ मेक डीएचईचे वेबसायटीचेर हंगामी गुणवत्ता वळेरी जाहीर करतले. २९ आनी ३० मेक गुणवत्ता वळेरे विशीं कागाळी आसल्यार त्यो सोडयतले. इमेला वरवीं कागाळी सादर करपाची इत्सुकांक मेकळीक आसा.निमाणी गुणवत्ता वळेरी २ जुनाक जाहीर करतले. ४ जून ते ६ जून मेरेन प्रवेशा खातीरचे कावंसिलींग जातलें.