भांगरभूंय | प्रतिनिधी
मडगांव मार्केटांत जाल्ले मारपेटी उपरांत दुकानां बंद
मडगांव : मडगांव एसजीपीडीए मार्केटांत कर्नाटकांतल्यान बीफ हाडिल्ल्याचो दावो करीत चवकशे खातीर गेल्ले गोरक्षक आनी विक्रेत्यां मदीं मारपेट जाली. उपरांत दोगां विक्रेत्यांक अटक जाल्ली. ह्या प्रकारा उपरांत बीफ दुकानां बंद दवरपाचो निर्णय ऑल गोवा बीफ विक्रेता संघटणेन घेतला आनी हाचो फटको गिरायकांक बसला. नातलांचे फाटभूंयेर येवपी गिरायकांक रिकाम्यां हातीन परत परतुचें पडटा.
दोन दिसां आदीं मडगांवच्या एसजीपीडीए मार्केटा लागसारा कर्नाटकांतल्यान बीफ हाडलां अशें विचारले उपरांत गोरक्षक आनी मांस विक्रेत्यां मदीं मारपेट जाल्ली. हे विशीं आतां मेरेन ११ जाणांचेर गुन्यांव नोंद जाला. मास विक्रेत्यां मदल्या दोगांक अटक जाल्ली. उपरांत दुसरे दिसा तांकां जामिनूय मंजूर जाल्लो. अटके उपरांत बीफ विक्रेता असोसिएशनाची बसका जाली. बसकेंत मारपेट केल्ल्या गोरक्षकांक अटक जावंक ना आनी विक्रेत्यांक अटक जाली, हाचो निशेध केलो. मार्केटांत मांस हाडपी गाडयां सयत विक्रे वेळार पुलीस संरक्षण दिवचें, अशी मागणी केल्ली. तशेंच मांस विक्रेत्यांक मारपेट केली, तांचेर अटकेची कारवायेची मागणी केल्ली. हेच फाटभूंयेर मांस विक्रेत्यांनी मन्ना बेपारी हांच्या नेतृत्वाखाला आमदार दिगंबर कामत हांची भेट घेवन समस्या मांडल्यो.
हे बसके वेळार ठोस निर्णय जावंक नाशिल्ल्यान ऑल गोवा बीफ विक्रेता संघटणे कडल्यान सोमारा गोंयचीं सगळीं बीफचीं दुकानां बंद दवरपाचो निर्णय घेतिल्ल्याचें मुन्ना बेपारी हांणी सांगिल्लें. सोमारा बीफाचीं दुकानां उक्तीं करूंक नात. नातलांचे फाटभूंयेर क्रिस्तांव भावां कडल्यान बीफाची मागणी आसता. अश्या वेळार दुकानां बंद दवरिल्ल्यान तांकां आडखळ जाल्या. गिरायक बीफ विकत घेवपाक येतात. मात तांकां रिकाम्या हातांत परतुचें पडटा. राज्य सरकारान क्रिस्तांव भावांच्या ह्या सणाचे फाटभूंयेर मांस विक्रेत्यांच्या प्रस्नाचेर बेगीबेग निर्णय घेवचो आनी मांस उपलब्ध करून दिवपाची मागणी जाता. मुख्यमंत्री डॉ. प्रमोद सावंत आतां वेस्टर्न बायपासच्या उक्तावणा खातीर येतले तेन्ना मांस विक्रेते पदाधिकारी तांची भेट घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
