भांगरभूंय | प्रतिनिधी
बीड, खबरां संस्थाः वेगान येवपी ट्रकान धपको दिल्ल्यान 6 भक्तांक जाग्यारुच मरण आयलें. हो अपघात सोलापूर-धुळे म्हामार्गाचेर नामलगांव फाटा वाठारांत शेनवारा सकाळीं जालो. हे सगळे भक्त दर्शना खातीर पेंडगांवच्या हनुमान देवळांत चलत वताले.
चड म्हायती प्रमाण, शेनवारा सकाळीं सुमार साडेसात वरांचेर बीड शार आनी शिदोड गांवांतले कांय भक्त हनुमान देवळांत चलत दर्शना खातीर वताले. तेन्ना वेगान वचपी ट्रकान तांकां चिड्डले. हो अपघात इतलो भिरांकूळ आशिल्लो की जाग्यारुच 4 भक्तांक मरण आयलें. जाल्यार हॉस्पिटलांत उपचारा वेळार आनीक दोग जाणांक मरण आयलें.
हे घडणुकेची म्हायती मेळटकच पुलीस आनी थळाव्यांनी जखमींक हॉस्पिटलांत व्हेले. हे घडणुकेंत हेर कांय भक्त जखमी जाल्ल्याची म्हायती मेळटा. तांचेर बीड जिल्लो हॉस्पिटलांत उपचार सुरू आसात. पुलिसांनी ट्रक ड्रायव्हराक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
