भांगरभूंय | प्रतिनिधी
पर्वरीः विद्या प्रबोधिनी कॉलेज ऑफ कॉमर्स, एज्युकेशन, कम्प्यूटर अँड मॅनेजमेंट, विद्यानगर, आल्तो-पर्वरी, गोंय आनी हरमल पंचक्रोशी शिक्षण मंडळाचे गणपत पार्सेकर कॉलेज ऑफ एज्युकेशन, विद्या संकुल, भोम, पठार, हरमल ह्या कॉलेजीनी शिक्षणीक वर्स 2025-26 खातीर बीए.बी.एड आनी बी.एससी.बी.एड एकत्रीत कार्यावळीं खातीर ऑनलायन प्रवेश प्रक्रिया सुरू जाल्या. हे खातीर पात्र उमेदवारांनी अर्ज करपाचो उलो उच्च शिक्षण संचालनालयान केलां. बीए.बी.एड खातीर 150 आनी बी.एससी.बी.एड खातीर 50 सुवाती आसात अशी म्हायती उच्च शिक्षण संचालनालयान दिल्या.
16 मे अर्ज करपाचो निमाणो दीस
ऑनलायन अर्ज प्रक्रिया बिरेस्तार 08 मे दिसा सकाळीं 11 वरांचेर सुरू जाल्या. अर्ज करपाचो निमाणो दीस शुक्रार 16 मे आसा. मेरिट लिस्ट तयार करप आनी समुपदेशन प्रक्रिया संबंदीत म्हाविद्यालयां वरवीं आयोजीत करतले अशी म्हायती उच्च शिक्षण संचालनालयानय दिल्या.
इत्सूक उमेदवारांनी समर्थ ई-गव्हर्नन्स संकेतथळा वरवीं अर्ज करचो. चड म्हायती खातीर https://www.dhe.goa.gov.in ह्या उच्च शिक्षण संचालनालयाच्या संकेतथळाक भेट दिवची. अर्जदारांक पुराय प्रक्रियेंत मजत करपा खातीर सविस्तर अर्ज आनी मार्गदर्शक तत्वां वेबसायटीचेर उपलब्ध आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
