भांगरभूंय | प्रतिनिधी
नवी दिल्ली, खबरां संस्था ः फाटल्या कांय म्हयन्यां सावन जम्मू- काश्मीरा सयत देशांतल्या वेगवेगळ्या सुवातींनी आतंकवादी हल्ल्याच्यो घडणुको सेगीत घडत आसात. हे फाटभुंयेर केंद्र सरकार आतां अॅक्शन मोडांत आयलां. गृह मंत्रालयान बीएसएफच्या दोन अधिकाऱ्यांक तांच्या पदा वयल्यान काडल्यात.
केंद्र सरकारान शिमे सुरक्षा दळाचे महासंचालक नितीन अग्रवाल आनी स्पेशल डीजी वाय.बी. खुरानिया हांकां पदा वयल्यान काडल्यात. हे संबंदीचे आदेश शुक्रारा रातीं उसरां केंद्रीय गृह मंत्रालयान जारी केल्यात.
नितीन अग्रवाल हांकां महासंचालक पदा वयल्यान काडले उपरांत आतां तांची मूळ केरळ केडरांत बदली जाल्या. तशेंच स्पेशल डी जी वाय बी खुरानिया हांकां ओडिशा केडरां धाडल्यात. मजगतीं भारताचे आंतरराश्ट्रीय शिमेची म्हळ्यार भारताच्या पाकिस्तान आनी बांगलादेश शिमेच्या सुरक्षेची जापसालदारकी तांचेर आशिल्ली. आतां तांचे सुवातेर नवी नेमणूक जातली.
‘इंडियन एक्सप्रेसा’च्या खबरां प्रमाण, गृह मंत्रालयान मंत्रीमंडळाचे नेमणूक समितीक हे संबंदी आदेश जारी करपाक सांगिल्लें. ते उपरांत हे आदेश जारी केल्यात. मजगतीं, जम्मू- काश्मीरांत आतंकवादी घुसखोरीच्यो वाडट्यो घडणुको पळोवन केंद्र सरकारान हो निर्णय घेतला. अंदूं 21 जुलय मेरेन जम्मू-काश्मीरांत 24 एन्कावंटर घडणुको आनी 11 आतंकवादी हल्ले जाल्यात. ह्या हल्ल्यांत 14 जाणांक आनी 14 सुरक्षा जवानांक मरण आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
