भांगरभूंय | प्रतिनिधी
बिहारांत फाटल्या 15 दिसांत सुमार 10 पूल कोसळ्ळे. बिहारांत सारण जिल्ह्यांत बिरेस्तारा सकाळीं एक पूल कोळ्ळो.
फाटल्या पंदरा दिसांत राज्यांत पूल कोसळपाची ही धावी घडणूक आसा. फाटल्या 24 वरांत सारणांतलो पूल कोसळपाची ही तिसरी घडणूक आसा. बुधवारा सारण जिल्ह्यांत जनता बाजार वाठारांत आनी लहलादपूर वाठारांत दोन ल्हान पूल कोसळिल्ले. तशेंच बुधवारा सिवानच्या महारजगंज वाठारांत एकाच दिसा तीन पूल कोसळ्ळे.
गंडकी न्हंयचेर बांदिल्ले दोन पूल आनी धमही न्हंयचेर बांदिल्लो पूल लेगीत कोसळ्ळो. गंडकी न्हंये वेलो हो पूल पंदरा दिसा पयलीं थळाव्यांनी वैयक्तीक निधींतल्यान बांदिल्ल्याचें ग्रामस्थांचें म्हणणें आसा. पूल कोसळपाचे खरें कारण अजून समजूंक शकले ना. पूण न्हंयेंतल्या नितळसाणीचें काम केले उपरांत न्हंयचे देगे वेली माती आनी उदकाचो नेटाचो प्रवाह हाका लागून पूल कोसळिल्ल्याचें लोकांचें म्हणणें आसा. बनियापूर सरेया आनी सातुआ ह्या दोन पंचायतींक जोडपी हो पूल आशिल्लो.
बिहार सरकाराक पुलांचे स्ट्रक्चरल ऑडीट करपाचे निदेश दिवपाची विनंती करपी जनहीत याचिका सर्वोच्च न्यालयांत दाखल केल्या. अधिवक्तो ब्रजेश सिंग हांणी दाखल केल्ले जनहीत याचिकेंत राज्यांतल्या पुलांची सुरक्षा आनी घटमुटी विशीं हुस्को उक्तायला. उंचेल्या पांवड्याची तज्ञ समिती स्थापन करपा बरोबरूच केंद्रीय रस्ते येरादारी आनी म्हामार्ग मंत्रालयाच्या मापदंडा प्रमाण पुलांचेर देखरेख दवपराची विनंतीय याचिकेंत केल्या.
पुला सकयले मातयेचोच अतिरेक जाल्ल्यान हो अपघात जाल्ल्याचें लोकांचें म्हणणें आसा. हो पूल कोसळ्ळो तेन्ना सुदैवान पुलार कोणूच नाशिल्ले. ताका लागून जिवीतहानी टळ्ळी. हो पूल 1982 वर्सा बांदिल्लो. एकूणच बिहारांत पूल कित्याक कोसळटात हाचेर सरकारान एक समिती नेमल्या. ताच्या अहवालाची वाट पळयतात. पूल कोसळपाच्या कारणांची चवकशी जरी चालू आसली तरी कांय गजालीं विशीं सरकारान लक्ष दिवप गरजेचें आसा.
राज्यांतल्या पुलांचें नेमान ऑडीट करप. हाका लागून धोको लक्षांत येतलो. पूल बांदीत आसतना ताचेर एखाद्या तज्ञ समितीन लक्ष दवरप. हातूंत बांदकाम मळा वेल्या अणभवी मनश्यांचो आस्पाव आसतलो. पूल ज्या कंत्राटदारान वा बांदपाचे एजन्सी कडेन दिला, ताच्यो अटी आनी शर्ती अदीक कडक करप. बांदकाम करतना योग्य ते मटेरियल वापरलां काय ना तें वेवस्थीत लक्ष दिवन पळोवप. पूल कमकुवत जाल्लो आसत जाल्यार धोक्याची सुचोवणी दिवप. सेगीत पूल कोसळप ही गंभीर गजाल आसा. हाचे कडेन सरकारान योग्य ते लक्ष दिवपाची गरज आसा.
50 लाख नोकऱ्यो
लोकसभेंतल्या प्रचारांतलो एक म्हत्वाचो मुद्दो आशिल्लो तो बेरोजगारी. दिसानदीस खूबशे तरणाटे शिक्षीत जायत आसात आनी ते नोकरेच्या सोदांत आसात अशें एक चित्र उबें आसा. विरोधी पक्षांनी लेगीत ह्या बेरोजगारीचो मुद्दो प्रचारांत व्हड प्रमाणांत मुखार हाडिल्लो, आनी ह्या मुद्या वेल्यान विरोधी पक्षांनी आपली ताकद वाडयिल्ली. आयज सरकारी नोकरेंतली संद ल्हवू ल्हवू उणी जायत आसा. सहाजिकूच नोकऱ्यांचेर मर्यादा येत आसात. मोदी सरकारान आपल्या तिसऱ्या कार्यकाळांत नोकरी दिवपाचेर लक्ष केंद्रीत केलां.
प्रधानमंत्री नरेंद्र मोदी हांणी स्वता सगल्या कॅबिनेट मंत्र्यांक आपोवन तांकां रोजगार वाडोवपा खातीर धोरणां तयार करपाच्यो सुचोवण्यो दिल्यात. बुधवारा प्रधानमंत्री नरेंद्र मोदी हांणी वेगळ्यावेगळ्या विशयांचेर कॅबिनेट समित्यो स्थापन केल्यात. ह्या कॅबिनेट समिती मदीं रोजगार आनी कुशळटाय विकासाचो आस्पाव आसा आनी खूबश्या वरिश्ठ मंत्र्यांचो हे समितींत आस्पाव आसा.
हातूंत अर्थ, रेल्वे, संरक्षण, रस्तो येरादारी, गृह खातें बी मंत्र्यांचो आस्पाव आसा. प्रधानमंत्री मोदी हांचो भर एका वर्सांत 50 लाख नोकऱ्यो तयार करपाचेर आसा. सद्या संरक्षण, रेल्वे आनी पोस्ट ह्या खात्यांत नोकरेच्यो खूबश्यो संदी आसात अशें कळटा. विशेश म्हणल्यार वस्त्रोद्देग मंत्रालयाक पुराय नॅटवर्क तयार करपाची सुचोवणी लेगीत दिल्यात. सगल्या कॅबिनेट मंत्र्यांक रोजगार वाडयात अशें थेट सांगलां.
सगल्या सचिवांक लेगीत हे विशींची सुचोवण्यो दिल्यात. दर वर्सा 50 लाख नोकऱ्यो दिवपाचें उद्दिश्ट दवरलां. हाचो अर्थ पांच वर्सांत अडेज कोटी नोकऱ्यो दिवपाचें उद्दिश्ट दिलां. हातूंतले जरी 60 ते 70 टक्के उद्दिश्ट जरी येसस्वीपणान पुराय केलें तरी लेगीत ती एक व्हड उद्दिश्ट पुर्ती थारुये.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
