भांगरभूंय | प्रतिनिधी
किशनगंज, खबरां संस्था: बिहारांतल्या कथलबारी गांवांत (जिल्हो किशनगंज) एक धक्को दिवपी घडणूक घडल्या. गूढ रोगाक लागून गांवांत भंयाचें वातावरण पातळ्ळां. आतां मेरेन ह्या दुयेंसाक लागून एकाच कुटुंबांतल्या तीन भुरग्यांक मरण आयलां. तशेंच एका भुरग्याचेर उपचार सुरू आसात आनी ताची स्थिती गंभीर आसा. हे घडणुकेची गंभीरताय मतींत घेवन किशनगंज जिल्होधिकारी विशाल राज हांणी भलायकी अधिकार्यां वांगडा गांवाक भेट दिवन परिस्थितीचो नियाळ घेतलो. जिल्लो प्रशासनान नागरिकांनी भियेवचें न्हय. वावड्यांचेर विस्वास दवरचो न्हय असो उलो मारला.
हे घडणुके उपरांत प्रशासनान रोखडेंच भलायकी शिबीर घडोवन हाडलें. मरण आयिल्ल्या भुरग्यांचे भलायकेचे नमुने घेवन तपासणे खातीर पाटणाक धाडल्यात. ह्या नमुन्याची सविस्तर तपासणी केल्या उपरांतच मरणाचें खरें कारण स्पश्ट जातलें अशी म्हायती भलायकी खात्यान दिल्या. साथीच्या दुयेंसाक लागून ही घडणूक घडल्या असो अदमास आसा. फाटले दोन दीस गांवांत भलायकी खात्याचे पंगड रावल्यात. तशेंच सगळ्या भुरग्यांची भलायकी तपासणी करपाचें काम सुरू आसा.
हे संबंदी किशनगंजचे मुखेल दोतोर देवेंद्र प्रसाद हांणी सांगलें, हे घडणुकेंत मरण येवपाचें कारण समजून घेवपा खातीर अहवाल धाडला. उपरांत मरणाचें कारण स्पश्ट जातलें. मुळाव्या तपासणेंतल्यान डेंग्यू आनी मलेरिया हीं संभाव्य कारणां अशें दिसून येता. तशीं लक्षणांय दिसून आयल्यांत. सध्या आमी हांगा आशा कामगारां वरवीं सर्वेक्षण करतात. १० वर्सां सकयल्या भुरग्यांचें पोशण आनी लसीकरण पातळी तपासतले, अशें डॉ. प्रसाद हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
