भांगरभूंय | प्रतिनिधी
सारण, खबरां संस्था: बिहाराच्या सारण जिल्ह्यांत आयतारा सकाळीं आनीक एक पूल कोसळ्ळो. फाटल्या पंदरा दिसांनी पूल कोसळपाची ही धावी घडणूक. फाटल्या २४ वरांत सारणांत पूल कोसळपाची ही तिसरी घडणूक. बिरेस्तारा सारण जिल्ह्यांतल्या जनता बाजार वाठारांत आनी लहलादपूर वाठारांत दोन ल्हान पूल कोसळिल्ले.
मजगतीं, परत परत पुल कोसळपाचीं कारणां सोदून काडपा खातीर उच्च पांवड्यावेले चवकशेचो आदेश दिल्ल्याची म्हायती जिल्लो दंडाधिकारी अमन समीर दिली. आयतारा सकाळीं पयलींच हो पूल कोसळिल्ल्यान जिणेक लुकसाण जावंक ना अशें तांणी सांगलें.
गंडकी न्हंयचेर हो पूल पंदरा वर्सां आदीं थळाव्या लोकांनी वैयक्तीक निधींतल्यान बांदिल्लो अशें लोक सांगतात. पुल कोसळपाचें खरें कारण आजून कळूंक ना. मात, न्हंयेंतलें नितळसाणेचें काम केले उपरांत देगेक उणी माती आशिल्ल्यान आनी उदकाचो प्रवाह नेटान आयिल्ल्यान पूल कोसळिल्ल्याचें थळाव्यांनी सांगलें.
सिवान, सारण, मधुबनी, अररिया, पूर्व चंपारण आनी किशनगंज जिल्ह्यांत फाटल्या १६ दिसांनी वट्ट धा पूल कोसळ्ळ्यात. थळाव्यांनी सांगलें, जिल्ह्यांत फाटल्या कांय दिसां सावन घोग्यांनी पावस पडटालो. ताक लागून पूल कोसळपाची घडणूक घडली.
जनहीत याचिका दाखल
बिहार सरकाराक पुलांचें स्ट्रक्चर ऑडीट करपाचे निर्देश दिवपाची मागणी करपी जनहित याचिका सर्वोच्च न्यायालयांत दाखल केल्या. अधिवक्ता ब्रजेश सिंह हांणी दाखल केल्ले जनहीत याचिकेंत राज्यांतल्या पुलांची सुरक्षा आनी घटसाणीचेर हुस्को उक्तायला. उच्चस्तरीय तज्ज्ञ समिती स्थापन करपा वांगडा केंद्रीय रस्ते वाहतूक आनी महामार्ग मंत्रालयाच्या मापदंडा प्रमाण पुलांचेर देखरेख दवरपाचीय मागणी याचिकेंत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
