भांगरभूंय | प्रतिनिधी
पाटणा, खबरां संस्था : bed performance हाचो अर्थ खाटी वयली कामगिरी. ह्या उतरांचो तसो अश्लील अर्थ जाता. शाळेंतल्या शिक्षकांक ‘bed performance’ खातीर दंड घाल्ल्याचें तुमी केन्ना आयकलां? आयकुपाक विचित्र दिसतलें, पूण बिहारांतल्या जमुई जिल्ह्यांत हे घडलां. शिक्षण खात्यान तेरा शिक्षकांचो पगार कापला. कारण ते गैरहजर आशिल्ले आनी ‘bed performance’ हें दुसरे कारण आशिल्लें. खरें म्हणल्यार bad बदला bed अशें खात्यान आदेशान म्हणलें आनी तिडकल्ल्या शिक्षकांनी निदर्शनांच केलीं.
२२ मे दिसा शिक्षण अधिकाऱ्यांनी जमुई जिल्ल्ह्यांतल्या कांय शाळांक अचकीत भेट दिली. त्या वेळार बरेच शिक्षक कामार गैरहजर आशिल्ल्याचे दिसलें. तांतूतल्या बऱ्याच शिक्षकांची कामगिरीय असमाधानकारक, वायट आशिल्ली. हें मतींत घेवन जिल्हो शिक्षण अधिकाऱ्यान शिक्षकांचेर कारवाय करपी एक अधिकृत आदेश पत्र काडलें. मात पत्रांतल्या चुकी खातीर हो विशय आतां भलत्याच कारणा खातीर गाजता.
आदेश पत्रा प्रमाण, १३ शिक्षकांचो पगार तांच्या bed performance खातीर कापला. हें पत्र सोशल मिडियाचेर व्हायरल जालां. आतां जिल्हो शिक्षण कार्यालयान खुलासो केला, bad performance हें चुकून bed performance अशें टायप जालें. टायपींग करप्याची ती चूक. ते खातीर दिलगीर आसात. पूण पुराय जिल्ह्यांतलो शिक्षक वर्ग अजून बेजार आसा. त्या पत्रांत संबंदीत दादले, बायल शिक्षकांचीं नांवांय आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
