भांगरभूंय | प्रतिनिधी
नवी दिल्ली, खबरां संस्था ः बिल्किस बानू सामुहीक बलात्कार प्रकरणांतल्या 11 आरोपींची ख्यास्त माफ करपाचो निर्णय गुजरात सरकारान घेतिल्लो. ताचेर देशभरांतल्यान खर प्रतिक्रिया आयिल्ल्यो. ह्या निर्णया संबंदी बिल्किस बानू हांणी सरळ सर्वोच्च न्यायालयांत अपील केल्लें. गुजरात सरकारान ह्या 11 आरोपींची ख्यास्त माफ करपाचो घेतिल्लो निर्णय सर्वोच्च न्यायालयान रद्द केला.
बिल्किस बानू प्रकरण कितें?
2002 वर्सा गुजरात दंगली वेळार बिल्किस बानूचेर 11 आरोपींनी सामुहीक बलात्कार केल्लो. ते उपरांत ताच्या कुटुंबांतल्या सात वांगड्यांचो क्रूरपणान खून केलो. बलात्कार केल्ल्या प्रकरणांत ह्या 11 आरोपींक आजीवन बंदखणीची ख्यास्त फर्मायली. पूण पोरूं गुजरात सरकारान ह्या कांय आरोपींची उरिल्ली ख्यास्त माफ करून तांका बंदखणींतल्यान सोडपाचो निर्णय घेतलो. ह्या निर्णया आड बिल्किस बानो हाणें सर्वोच्च न्यायालयांत अपील केलें. आयज न्यायालयान ह्या प्रकरणांत आपलो निकाल दिला. ताका लागून ह्या आरोपींक परत बंदखणींत वच्चें पडटलें.
न्यायालयान कितें सांगलें?
मजगतीं, सर्वोच्च न्यायालयान ह्या प्रकरणांत निवाडो दितना गुजरात सरकारा विशीं निरीक्षण नोंद केलें. हो गुन्यांव गुजरातांत जालो तरी ह्या प्रकरणांत आरोपींचेर महाराष्ट्रांत खटलो चलोवन ख्यास्त फर्मायली. ते खातीर गुजरात सरकाराक आरोपीक ख्यास्त माफ करपाचो निर्णय घेवपाचो अधिकार ना. देखूनच गुजरात सरकारान ह्या 11 आरोपींची ख्यास्त माफ करपाचो घेतिल्लो निर्णय रद्द केला, अशें सर्वोच्च न्यायालयान ह्या वेळार सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
