भांगरभूंय | प्रतिनिधी
पणजी: हडफडच्या बिर्च नायट क्लबांतले उज्याचे घडणुकेच्या पांचव्या दिसा क्लबाचे धनी आनी खाश्या भाव सौरभ आनी गौरव लुथरा हांकां थायलंडांत ताब्यांत घेतले. फुकेटच्या थळाव्या पुलिसांनी तांकां ताब्यांत घेतले. ह्या दोगांकूय भारतांत हाडपा खातीर प्रत्यार्पणाची प्रक्रिया सुरू जाल्या.
थायलंड पुलिसांनी लुथरा भावांचे फोटोय जारी केल्यात, जातूंत तांच्या हातांक बेडयो आसात. तांणी तांचे पासपोर्ट जप्त केल्यात. गोंय पुलिसांनी केंद्र सरकारा कडेन पत्रवेव्हार करून नेमां प्रमाण भारतीय पासपोर्ट निलंबीत केल्ले. केंद्र सरकारान थायलंड सरकारा कडेन पत्रवेव्हार केले उपरांत लुथरा भावांक फुकेट पुलिसांनी ताब्यांत घेतले. सुत्रां प्रमाण, भारतीय अधिकार्यांचो एक पंगड थायलंडाक गेला आनी २४ वरां भितर लुथरा भावांक ते परत घेवन येतले. उपरांत गोंय पुलीस तांकां ताब्यांत घेतले.
हडफडेंच्या बिर्च नायट क्लबांत ६ डिसेंबराक उजो लागिल्ल्यान २५ जाणांक मरण आयिल्लें. हे घडणुके उपरांत हे दोगूय भाव थायलंडाक पळून गेल्ले. दोगांयचेर सदोश मनीसबळ आनी निश्काळजीपणाचो गुन्यांव दाखल केला.
ह्या दोगांयनी दिल्लीच्या रोहिणी न्यायालयांत अंतरिम जामिना खातीर केल्ले अर्ज पयर भायर मारिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
